Demòran enqüèra quauquas plaças per l’estagi de lenga organizat la dimenjada qu’arriba, lo dissabte 17 e lo dimenge 18/11 a Ondres (país de Senhans, despartament de las Lanas). Qu’es organizat per l’associacion “Gascon Lanas” (Gropament associatiu per la sauvaguarda de la nòsta cultura d’òc dens las Lanas, secccion landésa de l’IEO) en ligason dab lo Conselh Generau 40. Que serà la 8au edicion d’aquera formula qui a donc remplaçat l’estagi long d’estiu que’s debanava a l’abadia d’Artós mes que ne tocava pas tròp de monde. Dab los estagis d’ua dimenjada (fin de setmana), mei de gents qu’arriban a liberà’s, seguir ua petita formacion e, atau, rencontrar d’autes passionats de la lenga nòsta e escambiar en tot enténer d’autes parlars e descobrir tèxtes barrejats de la literatura d’òc. Tres nivèus son prepausats: apregondiment, nivèu mejan, debutants.
 
Los organizators qu’esperan tocar non solament lo public deu Senhans, deu Marensin o de la Maremna, mes tanben lo monde de mei luenh (País d’Òrta, Baiona o quitament Bearn, Bordalés…). L’estagi que’s debanarà au Larèr d’Educacion Populara d’Ondres.  Sheis òras de cors dens la jornada entre 9h e 17h30. Los qui volerén dromir, qu’ac poderàn dens “mobil homes” deu terrenh de campatge. Inscripcions: +33(0)5 59 45 39 38 o mbaris-oc@orange.fr ocontactar l’encargada de mission cultura e patrimòni au Conselh generau (+33(0)5 58 46 07 10 o maryse.bougue@cg40.fr).
 
 
 
 
 
 
Joan Jacme Fénié
 
 
 
 
 

A las termièras deus país d’òc. Ondres, vilatge deus “Chaucha-padèras” - un chafre eretat deu temps, ce m’an dit, on los òmis anavan a Baiona véner lenha o  las hemnas hadèvan la leishiva tà las granas maison e ostalarias de la ciutat de las arribas d’Ador- la defénsa de la cultura gascona e de lenga occitana en generau es dinamica. Atau, quauques Gascons deu Senhans e deu parçan baionés èran annats en julhet de 2009 har ua petita camada dens “l’Aup italiana”. Menhats per lo Miquèu Baris, adara president de l’associacion “Gascon Lanas”, quauques aderents e amics de l’associacion “Eclat “(Equipa per la cultura locau e l’animacion toristica), acompanhavan la vintena joens chancaires e dançaires deus “Aulhèrs deu Senhans” dens ua de las valadas occitanas deu Piemont, dinc a la hont du flumi Pò, mei precisament dens lo vilatjòt d’Ostana dont lo maire  estó un deus fondators de la Chambra d’òc. Qu’èran renforçats tanben per quauques “Pingorlats”, valents cantaires plenhs d’estrambòrd de l’associacion “Ací Gasconha” d’Anglet.   Aquera dinamica es per ua part, solide, a l’origina de l’obèrtura d’ua classa bilingüa1 a l’escòla de Sent Martin de Senhans, cap-lòc d’aqueth canton de las termièras d’Occitània.         JJF       _____ 1 A la rentrada escolara 2012, tres sites bilingües que fonccionan hens las Lanas, ja que la politica deu Conselh Generau sii un chic timidòta cap a la lenga nòsta qu’a tendéncia a considerar sonque com un testimoniatge deu passat. Totun qu’ajuda un chicòt lo gascon com ic prova lo sostien aportat aus estagis com lo d’Ondres. Los tres sites en question que son Monthòrt (Shalòssa, creat en 2000 mercés a l’accion deu maire de l’epòca, lo Maurici Gassie, fondator justament de “Gascon Lanas” en 1999), Sent Martin de Sehans (2011) e adara Morcens, hens lo Brassens (petit país de la Gran Lana) on ua classa mairau foncciona dempuish seteme 2012.