Actualitats
An denonciat al Parlament Europèu lo mesprètz d’Espanha envèrs l’occitan
L’Intergrop de las Minoritats Tradicionalas, Comunautats Nacionalas e Lengas a aculhit a Estrasborg l’IEA-AALO
L’eurodeputat catalan Josep Maria Terricabras (ÈRC), qu’es un dels copresidents de l’Intergrop, aviá convidat los academicians araneses a expausar quina es la situacion de l’occitan en Aran après la senténcia del Tribunal Constitucional espanhòl de febrièr passat. Segon lo naut tribunal espanhòl, l’aranés pòt pas èsser lenga d’usatge preferencial per las administracions dins lo país de cap de Garona.
“Lo mesprètz que l’estat espanhòl a agut istoricament per la pluralitat e la riquesa lingüistica pòt ara èsser letal per l’aranés —çò diguèt Terricabras—; per tant, èra important que se poguèsse exprimir lo problèma al Parlament Europèu”.
La delegacion de l’IEA-AALO èra compausada de son president, Jusèp Loís Sans; del president de la seccion aranesa, Jèp de Montoya, e de sa secretària, Ròsa M. Salgueiro. Aquestes ramentèron que dempuèi 2006 l’occitan es lenga oficiala, coma lo catalan e l’espanhòl, dins tot lo Principat de Catalonha car atal o establís l’Estatut d’autonomia. Dins aquel sens, precisèron qu’aquel Estatut èra estat aprovat pel Congrès dels Deputats espanhòl e votat pel pòble catalan per mejan d’un referendum. Remarquèron qu’aquela reconeissença èra una mòstra d’un “enòrme respècte” per l’identitat occitana d’Aran, e soslinhèron que Catalonha es lo sol territòri ont la lenga occitana gaudís d’un tractament oficial talament important.
La senténcia del Tribunal Constitucional chepica fòrça los academicians araneses pr’amor que “sense ua preferéncia lingüistica, er occitan non poirà pas ocupar un espaci important e destacat ena administracion, ena educacion, enes mejans de comunicacion e en d’auti encastres fondamentaus que li permete de demorar viua”, en tot conclure que refusar son usatge preferencial “ei eth principi argumentau dera sua eliminacion”.
Deman, dijaus 13 de seteme er IEA-AALO exposarà en Parlament Europèu era situacion dera lengua occitana, aranés en Aran, en Estat Espanhòl.#UaLenguaUaAcademia#occitaniapic.twitter.com/QhU6oPbQbd
— IEA - AALO (@academiaaranesa) 12 de setembre de 2018
L'Institut d'Estudi Aranesi de l'Acadèmia Aranesa dera Llengua Occitana avui al Parlament Europeu a Estrasburg. Els he convidat perquè exposin la problemàtica de la llengua aranesa després de la sentència del TC que anul·la la preferència de l'aranès. pic.twitter.com/WiFSIdUFWP
— Josep-M. Terricabras (@jmterricabras) 13 de setembre de 2018
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
La France! Centre de cultura universal... com l'Espanya que 'desprecia quanto ignora'. El seu menyspreu de les llengües populars, és motiu per invalidar la seva proclamada 'democràcia'. Com un fill ha de menystenir la llengua de la mare?.
Què poden saber quatre ignorants, de las finesas de la cultura?
Segon lo naut tribunal espanhòl, l’aranés pòt pas èsser lenga d’usatge preferencial per las administracions dins lo país de cap de Garona ?
E ben segon la constitucion de l'estat francés, cap autra lenga que lo francés non pòt èsser lenga d'usatge, ni preferencial ni segondari, ni dins los païses de Garona, ni endacòm mai.
Lo mesprètz que l’estat francés a agut istoricament per la pluralitat e la riquesa lingüistica es indiscutiblament letal per l’occitan e totas las autras lengas d'aquel estat multicultural ; per tant, seriá fondamental que se poguèsse exprimir lo problèma al Parlament Europèu, mas taben davant lo Tribunal Penal Internacional.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari