L’escòla Kenmore South de la vila australiana de Brisbane a punit Harper Nielsen, una escolana de 9 ans, qu’a refusat de cantar en classa l’imne nacional del país perque ditz qu’es una cançon racista. La decision de la filha a fach polemica: d’unes vòlon que siá fòrabandida de l’escòla, d’autres saludan la determinacion de Nielsen.
 
La mainada diguèt a la cadena ABC News Australia que la cançon “Endavant Austràlia justa” es racista. “Quand aquò foguèt escrich, voliá dire «Endavant, las gents blancas d’Austràlia!»”, çò justifica Nielsen que tanben planh las paraulas de l’imne que parlan d’un país jove, puèi que, segon ela, “mesprèsa los aborigèns que fa mai de 50 000 que vivon aicí”.
 
E mai la dròlla aguèsse refusat de cantar l’imne, l’escòla la menacèt d’expulsion se s’alçava pas. “Me sentiguèri coma s’ensagèsson de me raubar mon poder e aquò me fustibulèt per que ieu me bati per l’equitat e l’egalitat per totes”, çò diguèt la drolleta, que decidiguèt de demorar en silenci e assetada.
 
Son paire,  Mark Nielsen, se sent “plan fièr” del coratge que sa filha a mostrat e a explicat que çò qu’ela vòl es “far prene consciéncia e far pensar”. Totun, la senatritz Pauline Hanson a criticat l’accion de la jove Harper. “Nos trobam davant una enfantona amb lo cervèl lavat, e sabètz que fariái ieu? Ieu li donariái un còp de pè al cuol”. E mai apondèt que la filha “aviá pas cap d’idèa de çò qu’es l’istòria”, e critiquèt los parents per l’aver encoratjada a protestar contra l’imne nacional.
 
Tanben lo ministre de l’Educacion, Jarrod Bleijie, a fach de repròchis sus Twitter als parents d’Harper. "Vergonha als parents", çò ditz. “Arrèsta l’estupida protèsta e canta amb fiertat l’imne nacional”, çò ditz a la joventa, en tot precisar que s’agís d’una “manca de respècte envèrs lo país e sos veterans”. En mai d’aquò, assegura que “se contunha de se comportar coma una malapresa, la caldrà expulsar”.
 
Pasmens, suls rets socials lo sosten a la mainada es enòrme. Amb l’etiqueta #HarperNielsen, Twitter es comol de messatges que dison “qu’es pas una malapresa” mas “una eroïna de la pensada critica”, o ben que tot çò que Harper vòl “es l’inclusion”. I a pereu de mond que se mòstran esglasiats del fach que se menace una filha de 9 ans per aver refusat de cantar una cançon.
 
 
 

 

Shame on her parents for using her as a political pawn.Stop the silly protest and stand and sing proudly your National Anthem. Refusing to stand disrespects our country and our veterans. Suspension should follow if she continues to act like a brat  #qldpolhttps://t.co/F0StkeBJDa

— Jarrod Bleijie (@JarrodBleijieMP) 12 de setembre de 2018

 
 
To kneel or not, A brave girl makes a stand