Lo senator estatsunidenc Bernie Sanders e l’èx-ministre grèc Giannis Varoufakis prepausan un movement internacional progressista per combatre l’èrsa d’autoritarisme internacional. “Es ora que los democratas del Mond entièr bastiscan una Internacionala Progressista per defendre los interèsses de la majoritat sus cada continent, dins cada país”, çò respond Varoufakis a las reflexions del senator de Vermont Bernie Sanders dins lo jornal The Guardian, que presenta lo besonh d’arrestar l’autoritarisme representat per Donald Trump, Vladimir Putin, Benjamin Netanyahu, Viktor Orbán e Xi Jinping. “Als Estats Units, en Euròpa, en Russia, en Orient e en Asia vesèm de movements dirigits per de demagògs qu’esplechan las paurs de la populacion, los prejutjats e las injustícias per arribar al poder e i demorar”, çò ditz Sanders.
 
“Cal comprene qu’aqueles autoritaris fan partida d’un front comun. An un contacte pròche, partejan de tacticas e, dins lo cas dels movements d’Euròpa e America quitament de fondadors. La familha Mercer, per exemple, que sostenguèt l’infama Cambridge Analytica, foguèt una ajuda clau per Trump e Breitbart News, qu’opèra en Euròpa, als Estats Units e en Israèl per far avançar los meteisses plans antiimmigracion e antimusulmans.”
 
En mai d’aquò, Sanders assolida que per “combatre d’un biais efectiu l’espelida d’un ais internacional d’autoritarisme, avèm de besonh d’un movement internacional progressista que se mobilize darrièr una vision de prosperitat partejada, de seguretat e de dignitat per totes, e que s’adreice a l’inegalitat globala massissa existenta, e pas unicament a la riquesa del poder politic”.
 
Dins un autre article, Giannis Varoufakis assegura que “nòstra generacion serà remembrada per la marcha trionfala d’una internacionala nacionalista que sortiguèt de las cloacas del capitalisme financièr”. E mai deuriá tanben èsser recordada per l’aver afrontada, çò ditz, se “los progressistas dels Estats Units, de l’Union Europèa, del Reialme Unit e de païses coma Mexic, Índia e Sud-Africa, pòdon bastir una Internacionala Progressista”.
 
Coma primièr pas, Varoufakis prepausa la creacion d’un Conselh Internacional Progressista qu’amagestre un plan per començar un “New Deal” internacional.
 
Enfin, l’èx-ministre grèc de las finanças engatjat dins lo movement DIEM25, ditz qu’el crei qu’aquela internacionala progressista la deu dirigir “la revolucion politica de Bernie Sanders als Estats Units, lo Partit Trabalhista de Jeremy Corbyn, [lor] movement per la democracia en Euròpa (DIEM25), lo president elegit de Mexic, Andrés Manuel López Obrador, los elements progressistas del Congrès Nacional African o los movements que luchan contra l’intolerància e l’austeritat en Índia”.
 
 

A few days ago Bernie Sanders and Yanis Varoufakis made a call for an international progressive movement. Now we are at the second day of our DiEM25-Academy. Having a session with @zackexley from America and actually building this international movement #HopeIsBack#DiEM25pic.twitter.com/20Yz7Dl41U

— Robin_Scheben (@robinsceb) 16 de setembre de 2018