Lo 1r d’octòbre de l’an passat, los catalans e los araneses votavan l’independéncia del país dins un referendum, del temps que patissián una violéncia policièra esglasianta. De centenats de vidèos —faches sustot amb de telefòns mobils— an virat pel Mond en mostrant los imatges dels policièrs que atacavan las gents que votavan pacificament. Ara, lo jornal espanhòl Eldiario.es ven de publicar los imatges enregistrats per la polícia que servisson per veire la violéncia d’aquela jornada segon lo ponch de vista dels policièrs.
 
D’aqueles vidèos, lo pus long es lo de l’irrupcion de la polícia dins un burèu de vòte ont deviá votar Carme Forcadell, alavetz presidenta del Parlament de Catalonha e ara en preson preventiva. Es un dels cases que lo jutge acceptèt pas la denóncia contra la violéncia dels policièrs per manca de pròvas que permetèsson d’identificar cap d’agent. Ça que la, mòstra cossí los policièrs intravan dins lo sit e rescontravan lo mond amb los braces levats e sens cap de violéncia. Aquí, rompèron las pòrtas a còps de maça mentre que s’exclamavan frustrats: “Ont son las putas urnas?”. Los ciutadans las avián amagadas en vesent l’arribada dels policièrs que reüssiguèron pas a las trobar. Puèi, quand èran partits, las tornèron metre en plaça per tal que se poguèsse contunhar de votar en patz.
 

 
En seguida podètz veire d’autres vidèos.