Los cònsols e los conselhièrs municipals de l’estat francés demandan a l’estat “d’arrestar la recentralizacion que despolha las collectivitats de lor argent e de lors competéncias”. Amassadas dimècres passat al Congrès de las Regions de França, al Faròt de Marselha, las tres grandas associacions d’elegits de l’estat faguèron la “Crida de Marselha per las libertats localas”, e la faguèron “units dins la diversitat de [lors] istòrias e de [lors] sensibilitats politicas” en tot constituir una associacion que los reünís amb lo nom dels “Territòris Units”.
 
Aquela “Crida” es signada per mai de 1200 elegits de tot l’estat francés e explica: “Luènh d’èsser una menaça quina que siá per la Republica, la descentralizacion es una escasença. Çò que la mina es l’ultraconcentracion parisenca, son las promessas non tengudas d’un estat trombosat, es l’impression que lo vejaire dels territòris compta pas, que los elegits locals son vagament consultats mas pas jamai escotats”. Entre d’autras causas, los elegits planhon que las regions ajan perdut las competéncias en l’educacion après “una reforma facha per de tecnocratas parisencs” que menaça mai d’un centre educatiu de barrament.
 
Demest los signataris podèm remarcar Gérard Larcher, president del Senat, Dominique Bussereau al cap de l’Assemblada dels Departaments de França, François Baroin, president de l’Associacion dels Cònsols de França, Hervé Morin que baileja la de las regions, e Renaud Muselier, president de la region de Provença.
 
“Auriáu preferit qu’aguessiam a nòstre costat un govèrn que se serviguèsse pas dei collectivitats territorialas coma variabla d’ajustament de sei politicas publicas”, çò diguèt Muselier a Var-Matin. “Mentre que pensaviam legitimament d’anar devèrs un 4n acte de descentralizacion, nos dirigissèm devèrs lo 1r acte de la recentralizacion. Es una terribla marcha enrèire per nòstre país. Es contrari au sens de l’istòria. Es l’invèrs de çò que se passa dins leis autrei país europèus”, çò precisèt.

 
 

 
 

Je crois aux libertés locales qui sont au fondement de la décentralisation et de la démocratie de proximité. Elles sont le socle d’un développement équilibré de notre pays. J’ai signé ce jour à @Marseille l’appel des régions, des départements et des communes #TerritoiresUnispic.twitter.com/4VROfdgQ9K

— Marie-Guite Dufay (@MarieGuiteDufay) 26 de setembre de 2018