Dissabte passat, au parat deu son Congrès Nacionau, l’Associacion deus Maires Ruraus de França (AMRF) qu’ac an dit de faiçon clara, be’n son harts!
 
Baisha de las dotacions de foncionament, mensh d’emplecs ajudats, pèrta d’autonomia, supression de la taxa d’abitacion o enqüèra barradura de las escòlas, shens parlar de hauça de las exigéncias deus administrats. Be seré longa, la lista sancèra de tot çò qui hè puishèu aus maires de las petitas comunas!
 
La situacion n’ei pas navèra, non, mes que creish mei anar mei, e que son mei nombrós, los maires qui deishan abans la fin deu lor mandat.
 
En Gasconha per exemple, qu’ei ua vertadèra andada qui truca las maisons comunas, los maires, mes tanben los conselhs municipaus: a Pavia (País d’Aush), lo maire Jean Gaillard qu’anonciè la soa demission diluns passat; a Vic de Bigòrra (País de Tarba), que’s debanaràn aqueste dimenge las eleccions municipaus parciaus, après la demission de 13 conselhèrs l’estiu passat; a Boga (Marsan), lo maire Christian Cenet n’anarà pas dinc au cap deu son quatau mandat, e que deisharà lo prumèr d’octobe. Lista non exaustiva e luenh de n’estar!
 
En França, lo nombre de demissions deus maires qu’a pujat de 55% en rapòrt au darrèr mandat.
 
Totun, e maugrat devís semblables e chifras eloquentas, tots los maires ne son pas maucorats, quan seràn conscients de las dificultats.
 
La setmana passada per exemple, Ràdio País qu’anè a l’encontre de Joan Arriubergé, maire de Haut deu Bòsc d’Arròs (País de Nai) entà arrecaptar lo son sentit suu maucontentèr creishent deus maires ruraus. Un devís positiu qui vòu mei que mei tot balhar l’ahida en l’aviéner, mercés a ua pression mei hòrta e ua comunicacion mei bona.

 
 
 
Ràdio País
 
 
 

---

Aqueste article es possible gràcias a un acòrdi de cooperacion entre Jornalet e Ràdio País.