Lesinhan festeja Josèp Anglada
 
Josep Anglada nasquèt (1868) a Lesinhan e moriguèt a Tolosa (1930). Foguèt un filològ e un romanista de tria. S’interessèt als trobadors. Publiquèt sus Guiraut Riquièr, Pèire Ramon de Tolosa, las Leis d’Amor, la Canso… Ne faguèt una antologia, mas s’interessèt tanben a la gramatica de l’occitan ancian en signant d’obratges que fan uèi encara referéncia. Fondèt l’Institut d’Estudis Meridionals.
 
De segur, Anglada èra felibre. Jos mai d’un nom d’escais, escriguèt de tèxtes mai leugièrs e mai risolièrs que sos libres de saberut. Per completar lo retrait, cal dire qu’es el que menèt lo primièr balon ovala dins la capitala de Corbièras que li dediquèt un monument tre 1933 e balhèt son nom al collègi local.
 
En aqueste mes d’octobre, del 11 al 26, la Mediatèca de la vila presenta una mòstra amb de documents (meses a disposicion pels Archius d’Aude e lo CIRDÒC) e prepausa doas conferéncias:
   
 
Escrits del marqués Baroncelli
 
Lo marqués (1869-1943) fa partida de l’istòria provençala amb son sosten e sa participacion al Felibritge e la relança de las tradicions camarguencas amb “la fe dei buòus”. Lo CEPDOC publica un audiolibre A l’endavans de Baroncelli-Babali epouèmo famous [poèmas famós]. La presentacion d’aquesta realizacion se farà dissabte 13 d’octobre a 4 oras del vèspre a la Bibliotèca Mejanas a Ais de Provença amb una conferéncia e un còp a beure.
 
 
De poètas al pè de la Montanha Negra
 
A Raissac de Lampin, a la debuta del sègle XX, lo mèstre d’escòla se disiá Prospèr Estieu. Al vilatge, en 1924, s’enterrèt Casimir Clòtas que Loís Albèrt ne recampèt sos poèmas dins lo recuèlh A la claror del calelh (1932). Los dos poètas seràn celebrats lo 20 e lo 21 d’aqueste mes dins de jornadas dedicadas als “Escrivans del territòri” ont, a costat del poèta Pierre Reverdy o de l’academician Jean Guéhenno, se trapan tanben Ipolit Fargas (cònsol republican d’Alzona al sègle XIX), qu’escriviá en òc, e lo curat Nérié que fasiá de sermons e de cants en lenga nòstra a la debuta del sègle XIX.
 
Per Estieu, se veirà la mòstra realizada pel CIRDÒC que lo presenta còsta son mèstre, August Forés; Sofia de Dixmude jogarà de bodega per apiejar sos poèmas sus aquel instrument; En Falcó balharà una conferéncia lo dissabte de vèspre (“Fourès, Vidal, Estieu, trois poètes au cœur de l’Occitanie”) e, en seguida, qualques unes de sos tèxtes seràn l’objècte d’una lectura teatralizada.
 
Lo dimenge de vèspre, Alan Roch parlarà de Casimir Clòtas e legirà qualques unes de sos poèmas abans lo concèrt final del grop vocal Canti-Canta.
 
De mai, los pichons de la calandreta de Carcassona son estat filmats a dire 6 poèmas d’Estieu e dos de Clòtas (per ne saber mai: ieo11(a)ieo-oc.org).
 
 
Loïsa Paulin nasquèt vaquí 130 ans
 
Loïsa Paulin nasquèt a Realmont lo 2 de decembre de 1888. Aquò fa 130 ans. La data serà marcada per una manifestacion que se tendrà dins la ciutat tarnesa. Al programa:
   
Una mòstra a la Mediatèca intercomunala completarà la manifestacion.
 
 
E los escrivans d’ara?
 
Es amb plaser qu’aprenèm la tenguda d’una novèla edicion de la Fèsta del Libre Occitan que se tendrà aquesta tardor al Castèl Catalan de Sant Orenç de Gamavila (Lauragués) lo dimenge 18 de novembre, a l’iniciativa de Letras d’Òc. Una bona escasença de rescontrar autors, editors, libraris e lectors… Un moment bèl d’escambis.
 
 
 
 
Alan Roch