Carme Forcadell, èx-presidenta del Parlament de Catalonha, embarrada en preson preventiva, es lo primièr presonièr politic catalan que mena Espanha davant la Cort Europèa dels Dreches Umans d’Estrasborg. Las avocatas de Forcadell i presentaràn dins los jorns avenidors una denóncia per violacion dels dreches fondamentals pel manten en preson preventiva. “Ela es empresonada per aver permés que se debatèsse e se votèsse una mocion al Parlament”, çò explica a VilaWeb una de las avocatas, que precisa que la situacion de privacion de libertat de Forcadell es extraordinària.
 
Fins ara, lo Tribunal Constitucional espanhòl aviá admés totes los recorses per violacion dels dreches fondamentals presentats pels diferents presonièrs politics, mas n’aviá pas resolgut cap en retardant la data al pus tard possible. Aquò, pels avocats, es pas qu’una estrategia per diferir la possibilitat de far apelacion davant Estrasborg. Totun, lo darrièr recors presentat per las avocatas de Forcadell es estat dirèctament refusat. Per tant, ara la via judiciària dins l’estat espanhòl s’es agotada e se pòt recórrer a d’instàncias internacionalas. D’un caire, se pensava qu’èra convenent d’esperar lo jutjament dels presonièrs politics, mas es probable qu’aqueste se tenga dins longtemps. E mai, après la senténcia es probable que totes los presonièrs politics acusats presenten de recorses, e que calga doncas esperar longtemps per portar l’afar davant la Cort Europèa dels Dreches Umans. L’inconvenient serà la lentor del tribunal d’Estrasborg.