Pel primièr còp, la lenga occitana serà al centre del debat dins lo Parlament Europèu. A la demanda de l’eurodeputada Catherine Grèze, elegida dins la circonscripcion del Sud-Oèst de França, l’intergrop sus las lengas minorizadas consagrarà la siá session del 22 de novembre a la lenga d’òc.
Aquel grop, format per d’eurodeputats de partits e de grops politics divèrses, s’amassa cada còp que i a session dins lo Parlament Europèu per tractar dels afars qu’afèctan las lengas e culturas minorizadas d’Euròpa. S’i tracta, normalament, lo cas concret d’una d’aquelas lengas e lo 22 de novembre serà lo torn de l’occitan. Ça que la, serà pas lo primièr còp que se tractarà lo tèma per rapòrt a França, pr’amor que la politica francesa intransigenta amb las lengas mal nomenadas regionalas atrai de costuma l’atencion dels eurodeputats.
Segon Grèze, la tòca de la session es de “far avançar la causa occitana a Brussèlas” e apond que la lenga occitana es oficiala en Espanha, ont es parlada per qualques milièrs de personas, mas o es pas en França, ont i a l’immensa majoritat de la populacion occitana. Es per aquò que se demanda: “Quina sòrta d’egalitat i a entre los ciutadans europèus?”. Segon lo sieu vejaire, l’Union Europèa a l’obligacion d’intervenir pr’amor qu’ajudar pas una lenga implica de la daissar morir “a fuòc lent”. Grèze considèra, de mai, que la lenga occitana fa partida del patrimòni e de las raices de la cultura francesa, e doncas la siá proteccion equival a protegir lo patrimòni cultural francés. Per tot aquò, crei qu’es urgent que França signe la Carta Europèa de las Lengas Minoritàrias e Regionalas, qu’es, a prepaus, una promessa electorala de François Hollande.
L’eurodeputada Grèze a convidat, en aquela escasença, qualques especialistas a prene la paraula. Dins aquel sens, i participaràn Guilhèm Latrubesse, conselhièr regional de Miègjorn-Pirenèus e pòrtavotz del Partit Occitan (PÒC), Joan-Loís Blenet, president de la Confederacion de las Calandretas, e Felip Hammel, director del CIRDÒC. Al delà, un trentenat de militants de la federacion Euròpa-Ecologia se desplaçaràn tanben a Brussèlas per assistir a la session e vesitar lo Parlament Europèu.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
De que'n pensan los professionaus de l'ensenhament ? E hargan locutors dab 3h / setmanas dens lo melhor deus cas ? Mei que mei, los joens qui pescan lo bachi dab l'opcion occitan, transmeten la lenga aus lors hihs quan fondan una familha ? Ne coneishi hòrt chic.
Èi en classa (Sud Gironda) una bèra màger part de 2das qui ignoran tot de l'occitan e d'autes qui n'an ideas faussas. Los impausar una lenga estrangèra brutalament, aquò me dèisha pensatiu.
#9 E ben ieu, soi pas contra lo francés, s'es opcional a Occitània, tè !
Es una bona idèia que quicom se faga a nivèl del parlament europèu. La sola causa que m'estona es la composicion de la delegacion dels "especialistas", un pauc estrecha : seria pas estat melhor de far venir de representants de la coordinacion Anem Oc, la qu'a organizat las manifs de Besiers -Carcassona-Tolosa, e qu'amb IEO, FELCO, Calandreta, Felibritge e Oc-bi es representativa de la movéncia culturala occitana dins sa diversitat ?
#5
" una part bèla del monde son PER l'occitan, mas pas impausat"
Lo monde seriá contra s'es impausat?! E benlèu seriá per s'es opcional ?
D'ont sortís aquesta teoria de Bernat-mon-oncle ?
Quin colhonada!
Quina fotralada de partit lo PÒC de defendre un tal punt de vista!
Segon çò que s'es demostrat en sociolingüistica:
— Cau parlar la lenga dins la vida viva vidanta e dins la vida familiala, senon la lenga es condemnada.
— L'escòla ajuda a sauvar la lenga, mai es un objectiu mens urgent que la vida vidanta e la familha. En tot cas, es pas una rason per laissar tombar l'occitan a l'escòla!
— Donc: renonciar a l'ensenhament obligatòri de l'occitan, es una posicion irrealista e ineficaça per quauqu'un que pretend voler sauvar l'occitan.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari