Soïssa aculhirà los jorns cinc e sièis de decembre que venon una reünion amb los representants del Polisario e del govèrn de Marròc, a la demanda de l'ÒNU. Fa sièis ans que los representants de Marròc e de la Republica Aràbia Saharauí Democratica (RASD) s'amassavan  pas. Mas ara o faràn acompanhats d'Argeria e Mauritània, en seguida de la convidacion facha per l'èx-president alemand, Horst Kohler.
 
Kohler a vesitat recentament la zòna, enviat per las Nacions Unidas, que parallèlament an decidit d’esperlongar la preséncia de Minurso, la fòrça d’interposicion que contraròtla l’alta al fuòc pachada en 1991.
 
 
Un país de descolonizar
 
Lo 14 de novembre, se complirà 37 ans de la partença de l’estat espanhòl dels territòris de la Republica Aràbia Saharauí Democratica. Après la partença dels espanhòls, los saharauís proclamèron lor independéncia mas l’invasion marroquina provoquèt un conflicte qu’encara es luènh d’èsser resolgut.
 
Aquel país foguèt considerat coma una partida del territòri espanhòl de 1884 a 1976. Considerat a partir de 1934 coma una província espanhòla de mai, vegèt coma la consciéncia nacionala de sos abitants se despertava pendent los ans 1970. Foguèt en 1973 que lo grop de resisténcia Front Polisario comencèt la lucha contra los colonizaires espanhòls. Eles reconeguèron lo drech d’autodeterminacion d’aquel pòble en 1976 mas permetèron als marroquins e mauritans de los envasir aquel meteis an.
 
L’invasion comencèt quand Marròc lancèt 300 000 civils contra las frontièras del Sahara Occidental en 1975. A aquela epòca, lo dictator espanhòl Franco èra a mand de morir, e foguèt lo nòu rei Joan Carles Ir que signèt l’abandon del territòri, en despièch dels dreches de sos abitants.