En Brasil, lo candidat de l’extrèma drecha, Jair Bolsonaro, a atengut una victòria impressionanta al primièr torn de las eleccions presidencialas d’aquesta dimenjara. Dins qualques moments del recompte semblava quitament que Bolsonaro poiriá aténher mai de la mitat de totes los vòtes, çò que li auriá donat la victòria dirèctament al primièr torn. En fin a atench un 46%, qu’es un estonament enòrme e que lo daissa en una posicion excellenta per ganhar lo segond torn, que se tendrà lo 28 d’octòbre que ven. De mencionar que Lula da Silva ganhèt sas primièras eleccions en 2002 tanben amb lo 46% dels vòtes al primièr torn.
 
Lo rival de Bolsonaro serà ara lo candidat del Partit dels Trabalhaires (PT), Fernando Haddad qu’a atench aperaquí lo 28% dels vòtes. Lo PT es lo partit de Lula da Silva qu’ara es en preson dins l’encastre d’un procés polemic e mes en question. Lula èra en tèsta de totes los sondatges, mas lo candidat que lo remplaça a pas atench aquela intencion de vòte e solament a tengut la majoritat al nord-èst del país. Per contra, Bolsonario a atench de resultats extraordinaros a Rio de Janeiro (53%) e a São Paulo (59%).
 
Sembla gaireben impossible que lo PT atenga pro de vòtes dins los segon torn per arrestar l’arribada al poder de Bolsonaro, un èx-militar ultradrechista qu’a trebolat entièrament la politica brasiliana. E mai se lo nomenan “lo Trump del Sud”, Bolsonaro se sembla mai a de politics autoritaris coma l’egipcion Abd Al Fatah As Sisio lo filipin Rodrigo Duterte.
 
Bolsonaro s’es presentat pel Partit Social Liberal, lo noven partit que participa a las eleccions dempuèi 1989. El defend la dictatura militara de 1964 e es partisan de la venda liura d’armas. En mai d’aquò, es un opausant afogat dels dreches dels omosexuals e defend que la tortura es un metòde legitim. De fach, es estat tres còps jutjat per d’insults e prepauses racistas e omofòbs.