Trobèron dissabte passat lo còrs desfigurat de la jornalista bulgara Viktoriia Marinova. Lo còrs foguèt trobat dins un pargue de Ruse, sa vila natala, près de Danubi. Segon lo ministèri public, l’avián violada, tabasada “amb una extrèma brutalitat” e estofada. Èra maire d’un enfant de sèt ans.
 
Sièis jorns abans, Marinova aviá denonciat dins lo programa de television qu’ela presentava de sospechats afars de corrupcion en relacion amb los fonzes de l’Union Europèa, e la jornalista anonciava de nòvas enquèstas. L’emission, apelada Detektor, es un programa d’investigacion jornalistica. Marinova lo presentèt pel darrièr còp lo 30 de setembre, quand entrevistava dos jornalistas qu’examinavan un afar de corrupcion d’una entrepresa de bastison d’estradas: aquesta auriá fach fraudulosament servir de fonzes de l’Union Europèa per de projèctes bailejats per d’autoritats localas. Los dos jornalistas èran lo bulgar Dimitâr Stoianov e lo romanés Attila Biro. Los arrestèt la polícia bulgara quand seguissián una pista sus la destruccion de documents restacats a aquela frauda.
 
 
Un suspècte detengut
 
Segon lo ministre de l’Interior bulgar, Mladen Marinov, se coneis pas cap de menaças envèrs la jornalista assassinada, e i a pas cap de pròva que lo crime siá en rapòrt amb son mestièr. Per contra, lo procuraire de Ruse, Georgi Georgiev, ditz qu’es una possibilitat. “Sa mòrt la causèron de còps al cap e d’asfixia, e trobèrem pas son telefòn mobil, ni las claus de sa veitura, ni mai qualques vestits”.
 
De son caire, lo president del país, Boiko Borisov, assegurèt que l’assassin o los assassins serián lèu arrestats. “Soi convencut qu’es una question de temps que se resòlga aquel assassinat. Avèm menats a Ruse los melhors criminològs, los quichem pas. An obtengut una granda quantitat d’ADN”.
 
Dissabte, la polícia arrestèt un suspècte de l’assassinat.
 
 
Lo país mai corromput de l’UE
 
Segon Transparéncia Internacionala (TI), Bulgaria es lo país mai corromput de l’UE, e segon la directritz de TI, Vanya Nusheva, la corrupcion se tròba dins totas las instàncias del poder d’aquel estat. D’efièch, abans la fin de 2017, Nusheva mostrèt son chepic dins un rapòrt. “La lucha contra la corrupcion es estada identificada coma l’endrech ont i agut mens de progrèsses dins los darrièrs ans”. Per quant al sistèma judiciari, Brussèlas critiquèt las empachas que l’estat bulgar a mesas a l’independéncia dels jutges.
 
Lo govèrn del país es entre las mans d’una coalicion de la drecha populista de Borisov amb lo partit ultradrechista Patriòtas Units.
 
 
Pauc de libertat de premsa e d’independéncia judiciària
 
En mai d’aquò, segon Reportèrs sens Frontièras, Bulgaria es tanben lo país de l’Union Europèa ont i a mens de libertat de premsa. Fa un an, de centenats de jornalistas participèron a una manifestacion a Sòfia en protèsta contra las menaças que lo viceprimièr ministre Valeri Simeonov, del Front Patriotic, aviá fachas envèrs los principals mèdias del país.
 
Per quant a la separacion dels poders, Bulgaria es lo país amb mens d’independéncia judiciària segon lo classament de la quita Union Europèa. Seguisson Eslovaquia, Croàcia e Espanha.
 
 
 

#VictoriaMarinova and https://t.co/NbpRMEVrhr had just done the only on air reporting on #GPGate before her assassination. Her last broadcast: an interview w/ RISE Romania reporter @Biro_A and @BivolBg's Dimitar Stoyanov on #GPGate. https://t.co/n35hTCbHkN

— Anonymous (@YourAnonCentral) 8 d’octubre de 2018

 

People held a vigil for Bulgarian journalist Viktoria Marinova, whose body was found raped, beaten and suffocated soon after she reported on alleged corruption involving EU funds.

Watchdogs rank Bulgaria lowest in the EU for press freedom and highest in corruption. pic.twitter.com/coULvqqbdY

— AJ+ (@ajplus) 8 d’octubre de 2018