Actualitats
Païses Catalans. La revolucion de las carròtas contra l’aumentacion de la TVA culturala
Un teatre de Catalonha engana l’aumentacion de la TVA en vendent de carròtas, amb de bilhetas coma present
L’aumentacion de la TVA dins l’Estat espanhòl a tocat mai que mai la cultura, dont la TVA culturala a passat de 8% a 21%. Lo teatre de Bescanó, en Catalonha, protèsta contra aquela aumentacion d’un biais fòrça original. An decidit de vendre pas mai de bilhetas. Ara vendon de carròtas, e pagan la TVA correspondent al legum, es a dire 4%. Ça que la, amb cada carròta venduda, i a una bilheta de compresa per anar al teatre coma present.
La propòsta aguèt lo sosten de la municipalitat de Bescanó e la del public, e es estada un succès. Los organizaires an degut pausar l’aficha “carròtas agotadas” per l’òbra Las Suicidàrias, la primièra produccion de la companhiá de Girona PocaCosa Teatre.
“Avèm causit la carròta per remembrar l’imatge de l’ase, lo baston e la carròta, e far una allegoria de la situacion culturala amb l’aumentacion de la TVA de 8% a 21%”, çò ditz lo director del teatre, Quim Marcé.
Al delà, la carròta es una de las primièras noiriduras que consumèt l’òme, una excellenta font de vitaminas, e segon çò que se ditz, es plan bona per la vista. En fach, qualques unes dels espectators del teatre de Bescanó an manjat lor bilheta d’intrada.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari