Lo jornalista dissident saudian Jamal Khashuqji (sovent transcrich Khashoggi) desapareguèt lo 2 d’octòbre, quand se gandissiá al consolat de son país a Istambol per prene qualques documents. Aquí seriá estat assassinat. Segon las autoritats turcas, lo tuèt un esquadron saudian. Pasmens, lo jornalista auriá enregistrat son assassinat amb sa mòstra intelligenta, çò raportava dissabte lo jornal turc Sabah. L'aparelh èra connectat al telefòn intelligent de sa calinhaira, que se trobava a l'exterior.
 
L'Arabia Saudita desmentís d'aver donat cap d'òrdre de lo tuar e assegura que las acusacions son de messorgas. E mai dison que lo jornalista reüssiguèt a sortir del consolat.
 
Segon The Washington Post —ont Khashuqji escriviá— i a de documents àudio e vidèo del crime. Aquel meteis jornal rapòrta que lo còrs foguèt espeçat.
 
Ara per ara, fa gaireben doas setmanas que lo crime aguèt luòc e an pas encara trobat lo còrs de Khashuqji. Divendres, venguèt en Turquia una delegacion saudiana per menar a bon tèrme una enquèsta conjoncha.
 
Lo crime pòt ara complicar las relacions de l'Arabia Saudita amb d'autres estats. Lo president dels Estats Units, Donald Trump, prometèt un "puniment sevèr" se se demòstra que las autoritats saudianas serián intervengudas dins la mòrt del reportèr. Ça que la, Trump apondèt que, per ara, i auriá pas de sancions per "frenar pas los afars dels Estats Units" amb l'Arabia Saudita, que son mai que mai la venda d'armas.
 
A causa d’aquel afar, qualques païses e entrepresas que devián participar a una conferéncia suls investiments a Riyad lo 23 d’octòbre, i vendràn pas.