Après un an d’encarceracion preventiva, Amnestia Internacionala exigís “la liberacion immediata” de Jordi Cuixart e Jordi Sànchez, los primièrs dos presonièrs politics catalans. Dins un comunicat, lo director adjonch de l’organizacion internacionala en Euròpa, Fotis Filippou, assegura que “i a pas cap de justificacion” per los manténer en preson preventiva. “Amnestia Internacionala considèra que lor detencion persistenta constituís una restriccion desproporcionada de lors dreches de libertat d’expression e de reünion pacificas”, çò afirma.
 
Los dos “Jòrdis”, coma lor dison en Catalonha, son presonièrs coma presidents d’Òmnium Cultural e de l’Assemblada Nacionala Catalana (ANC) respectivament, e son acusats de s’èsser servits de lors responsabilitats per “mobilizar de centenats de milièrs de personas e encoratjar una fòrça massissa qu’afrontèsse los policièrs encargats d’empedir lo referendum illegal”.
 
Dins aquel sens, lo comunicat d’Amnestia Internacionala afirma que “las acusacions an pas cap de fondament e que devon èsser retiradas”. En mai d’aquò, afortís qu’aquò “se pòt demostrar”. Lo ministèri public espanhòl acusa los Jòrdis de rebellion e sedicion per aver cridat a manifestar davant lo Ministèri de l’Economia de la Generalitat de Catalonha lo jorn que la polícia espanhòla i anèt far de perquisicions. Per tant, “de los acusar de delictes talament grèus e de los embarrar pendent un an es desproporcionat”, çò ditz l’organizacion de defensa dels dreches umans.
 
Uèi l’encarceracion dels “Jòrdis” a exactament un an.
 
 
D'acamps de protèsta en Catalonha e Aran
 
Uèi es previst per tot lo territòri d'acamps de protèsta contra l’encarceracion dels Jòrdis. A Vielha, Taula per Aran apèla a manifestar a 20h jol lèma "Un an de vergonha, un an de dignitat".
 

Dimars dia 16, harà un an qu'es Jòrdi's son empresoadi. En sègle XXI auem #presoèrspolitics quan no eren politics, demorant un judici injust. Volem hèr-les arribar eth nòste supòrt, ada eri e as sues familhes. Mos trapam en lòc de tostemp tàs 20 ores. #LibertatPresoèrsPoliticspic.twitter.com/yI8kfO5GbJ

— Taula per Aran (@Taula_per_Aran) 14 d’octubre de 2018

 

fffff		fffff
	Quins son ara los perseguits politics catalans?   A l’ora d’ara, son jutjats per la Cort Suprèma espanhòla los elegits seguents:   — per rebellion: Dolors Bassa, Toni Comín, Jordi Cuixart, Carme Forcadell, Joaquim Forn, Oriol Junqueras, Clara Ponsatí, Carles Puigdemont, Raül Romeva, Marta Rovira, Josep Rull, Jordi Sànchez, Jordi Turull;   —per malversacion de fonzes e desobesissença:  Meritxell Borràs, Carles Mundó, Lluís Puig, Meritxell Serret, Santi Vila;   — per desobesissença: Ramona Barrufet, l’occitana Mireia Boya, Lluís Corominas, Anna Gabriel, Lluís Guinó, Joan Josep Nuet, Anna Simó.   Quasi totes los acusats son de caps de las listas electoralas de las tres candidaturas independentistas (Amassa per Catalonha, ÈRC e CUP) elegits a las darrièras eleccions regionalas del 21 de decembre passat.   D’aquestes nòu son en preson, sèt en exili e los autres a l’espèra d’èsser convocats tornarmai.