Lo ministre de l’Interior italian, Matteo Salvini, ordenèt dissabte passat lo transferiment de totes los migrants e refugiats de Riace, un vilatge de Calàbria conegut per la reüssida de l’aculhença dels migrants e de son modèl d’integracion, e per sa lucha contra las politicas racistas de Salvini. La setmana venenta, los migrants seràn menats dins de centres de migrants dins d’autras vilas.
 
Detencion del cònsol màger
 
Lo cònsol màger de Riace, Domenico Lucano, l’arrestèron al començament d’octòbre, en l’acusant de favorir l’immigracion illegala per aver aculhit e emplegat de refugiats. Dins los darrièrs meses, Lucano aviá afrontat Salvini sul blocatge de l’argent public destinat als projèctes d’aculhença.
 
Ara, Lucano e sa femna son assignats a residéncia: son acusats de “violar qualques nòrmas per obténer de documents per fin que los migrants pòscan demorar en Itàlia”. Lo ministèri public explica que respond a una enquèsta de la “gestion dels fonzes del ministèri de l’Interior e de la delegacion del govèrn de Reggio Calabria dins la comuna de Riace per l’aculhença de refugiats e de demandaires d’asil politic”.
 
Salvini se regaudiguèt de la detencion de Lucano sus son Twitter. E lo Movement 5 Estèlas diguèt qu’aquela detencion demostrava l’engatjament del govèrn italian a “declarar la guèrra a l’afar de l’immigracion”.
 
Un modèl d'aculhença qu'a virat pel Mond
 
Lo cònsol màger detengut defend que l’immigracion a salvat lo vilatge que patissiá un grèu problèma de despoblament, e que lo modèl d’aculhença de Riace a virat pel Mond.
 
D’efièch, los ostals abandonats de Riace son estats restaurats amb de fonzes europèus e ara i demòran de refugiats e migrants qu’an creat d’obradors artisanals e de restaurants. Lo vilatge a recuperat son escòla mairala e una escòla ont s’ensenha divèrsas lengas.
 
Ne fa resson un documentari del realizaire alemand Wim Wenders, entitolat Il Volo. E mai, en 2016 la revista Forbes mençonava Domenico Lucano entre los 40 majorals mondials pus influents.