En julhet de 2015, los deputats franceses votèron lo desplegament sus tot l’estat del polemic comptador d’electricitat Linky. La societat Enedis es encargada d’installar Linky, es una filiala de la societat francesa d’electricitat EDF, que vòl aver installat 34 milions d’aqueles novèls comptadors d’aicí a la fin de 2021. Los comptadors Linky mesuran e transmeton dirèctament las donadas al fornidor d’electricitat, en permetent de facturar mai precisament e de realizar d’intervencions a distància. Mas son de mai en mai nombroses los ciutadans que refusan aqueles comptadors car, d’un latz, parlan d’ataca contra la vida privada e de l’autre s’inquietan dels risques sanitaris.
 
Dins aquel sens, Reporterre raportava al començament d’octòbre l’entrevista d’un ancian installator de Linky. A 53 ans e vestit d’una camiseta occitanista, l’òme revelèt d’informacions que farián venir l’afar encara mai polemic. Tenguèt pas mai d’un an a trabalhar per Enedis.
 
E mai se los installators son fòrça plan pagats, e recebon de primas per cada comptador installat, l’entrevistat parla de sofrença al trabalh, d’un ritme desfrenat e d’una pression extrèma, e mai afirma que lor demandavan de mentir als clients per pausar lo comptador “còste que còste”. Un dels arguments que los devián donar èra que lo comptador èra “bon per l’ecologia”, una afirmacion que li sembla absurda.
 
En mai d’aquò, l’òme explica que l’avián obligat d’installar de comptadors dins de luòcs amb d’installacions dobtosas o perilhosas.
 
De mai, refusèt l’installacion d’un Linky en cò sieu, mas li lo pausèron pendent son abséncia en profechant de la malautiá de sa maire.
 
Podètz legir l’entrevista sus Reporterre.