Amb l’aigat bèl de la setmana passada en país audenc, segur que lo mond esportiu es el tanben pertocat. Los clubs de XIII de Vilagalhenc (Cabardés) e de Ferrals (Corbièras), en particular, e d’unes dels jogaires an conegut degalhs bèls. La Federacion a decidit que l’integralitat de la recèpta dels rescontres internacionals d’aqueste dissabte 27 d’octobre a Carcassona (estadi Domèc: a 15h, rescontre entre femeninas França-Anglatèrra; a 18 h, Copa d’Euròpa: França-Galas) seriá donada als sinistrats.
 
 
Tres partidas d’importància
 
Aqueste rescontre entre França e Galas dobrirà una Copa d’Euròpa qu’es tanben qualificativa per la Copa del Mond de 2021. Caldrà ganhar per assegurar tre ongan la qualificacion (autrejada als primièrs dos del classament), se trapar pas dins una novèla tièra de partidas de barratges e poder preparar l’esperit tranquil lo rendètz-vos de 2021 en Anglatèrra. Dissabte, dins l’autra partida, Irlanda reçauprà Escòcia. Los dos finalistas venceires de la Superliga, Morgan Escarré e Roman Navarrette, lo mièg audenc dels Dragons Lucàs Albèrt e l’australian de Tolosa Rhys Curran intègran la lista dels 19 Blaus pressentits per l’afrontament de dissabte.
 
Dins lo Grop B europèu, Serbia bat Espanha 24-20, mas son los espanhòls qu’acompanharàn los russes pel torn seguent de qualificacion pel Mondial.
 
 
Austràlia tròp fòrta
 
Lo rei de Tònga aviá fait lo desplaçament a Auckland per seguir aqueste dissabte lo rescontre entre son esquipa e los Cangorós. Èra pas sol que l’estadi afichava complet. Los australians avián de se faire perdonar la desfaita de la setmana passada contra la Nòva Zelanda.
 
Los tongans foguèron plan actius e volontaris, mas cada deca se paguèt sul pic. A la pausa, los Cangorós èran ja anats 5 còps darrièr la rega blanca per menar 30-10. La partida foguèt mai equilibrada dins lo segond temps e se clavèt sus un avantatge de 34-16 pels Cangorós.
 
 
Tèst a Hull
 
Los neozelandeses an, eles, pres l’avion. Direccion: Euròpa per afrontar tres còps los angleses. Primièr rescontre: aqueste dissabte 27 d’octòbre a Hull.
 
 
 
 
Alan Roch