La Comission Europèa a rebutat lo budget d’Itàlia per 2019 e a demandat al govèrn d’aquel país que lo torne presentar dins un relambi de tres setmanas. Considèra que lo budget actual respècta pas lo pache europèu d’estabilitat budgetària.
 
Es lo primièr còp de l’istòria que l’executiu europèu refusa un budget d’un estat membre. “Me grèva d’èsser uèi aicí perque pel primièr còp la Comission Europèa a l’obligacion de demandar a un país europèu que revise sos plans budgetaris”, çò diguèt Valdis Dombrovskis, vicepresident de la CE per l’èuro.
 
Concretament, la CE demanda al govèrn de Giuseppe Conte que presente “un plan budgetari revisat” dins un relambi de tres setmanas perque considèra que l’actual “es pas sus la draia dels engatjaments presentats per Itàlia dins son programa d’estabilitat en abril passat”.
 
Lo 18 d’octòbre passat, la CE aviá avertit Roma de la possibilitat que los comptes respectèsson pas lo pache europèu d’estabilitat budgetària e, de fach, lo govèrn italian reconeis que sa politica budgetària seguís pas las nòrmas del pache d’estabilitat e de creissença. “Es estada una decision malaisida mas necessària perque lo PIB contunha d’èsser a de nivèls anteriors a la crisi e los sectors pus desfavorits de la societat italiana se tròban dins de condicions economicas dramaticas”, çò afirmava lo govèrn d’Itàlia dins una letra a la CE.
 
La CE aviá avertit Roma que l’aument del deficit fins al 2,4% del PIB èra lo triple que lo que l’aviá prepausat lo govèrn italian precedent e que se trobava fòrça luenh de l’ajustament estructural recomandat.
 
 
Itàlia pensa pas d’i cambiar res
 
Mas Roma respond que pensa pas d’i cambiar res e ditz qu’a pas paur. Lo viceprimièr ministre Matteo Salvini a anonciat publicament l’afrontament de Roma amb Brussèlas: “Ieu, personalament, soi disponible per rescontrar lo president de la Comission Europèa e li explicar cossí creisserà Itàlia amb aqueste budget. Mas degun trairà pas un sol èuro d’aqueste budget.”
 
Se lo govèrn italian manten aquela posicion, risca que se dobrisca una procedura per deficit excessiu e non-respècte del pache d’estabilitat. La multa pòt arribar al 0,2% del PIB.
 
Lo darrièr còp qu’un executiu italian afrontèt Euròpa pel budget arribèt amb lo govèrn de Silvio Berlusconi en 2011. Lo revengut per abitants se reduguèt d’un 3%, lo consum tombèt d’un 8% e, quand la prima de risc superèt los 570 ponches, la tròica faguèt tombar Il Cavaliere.
 
 
Calciga los papièrs de Moscovici
 
La conferéncia de premsa de la CE, ont lo comissari europèu de l’economia, Pierre Moscovici, presentava son vejaire envèrs lo budget italian, s’acabèt amb una accion de desfís. L’èurodeputat italian Angelo Ciocca se sarrèt de Moscovici, se descalcèt, prenguèt sa sabata e calciguèt simbolicament sos papièrs. Ciocca fa partida de la Liga, partit d’extrèma drecha qu’es al govèrn en coalicion amb lo populista Movement 5 Estelas.
 
“Ai calcigat amb una sòla «Made in Italy» la montanha de messorgas que Moscovici a escrichas contra nòstre país. Itàlia merita de respècte e aqueles «euroimbecils» o devon comprene. Baissem pas pus lo cap! Ai plan fach?”, çò disiá puèi Ciocca sus Twitter.

 
 

A #Strasburgo, HO CALPESTATO (con una suola Made in Italy!!!) la montagna di BUGIE che #Moscovici ha scritto CONTRO il #NostroPaese !!! L’Italia merita RISPETTO e questi #EuroImbecilli lo devono capire,  non ABBASSIAMO PIÙ LA TESTA !!! Ho fatto bene ??? pic.twitter.com/Dx5OeM0RMs

— Angelo Ciocca (@AngeloCiocca) 23 d’octubre de 2018