Los govèrns francés e espanhòl pensan de contunhar de vendre d’armas a l’Arabia Saudita, e mai lo govèrn d’Alemanha aja demandat de suspendre la venda d’armas al país arabi, en protèsta contra la mòrt del jornalista Jamal Khashuqji.

Per Macron, la mòrt de Khashuqji “a res a veire” amb la venda d’armas
 
Pel president francés, Emmanuel Macron, la venda d’armas auriá pas res a veire amb la mòrt del jornalista: “Aquò a pas res a veire amb lo subjècte que sèm a tractar. Es pas perque un dirigent ditz quicòm que soi obligat de reagir a cada còp”, çò diguèt Macron dimars al Salon Euronaval de Le Bourget.
 
De fach, Macron sembla de revendicar la presompcion d’innocéncia de Riad per l’afar Khashuqji. “Espèri que la vertat siá establida”, çò diguèt, malgrat las pròvas.
 
De mençonar que França foguèt en 2017 lo tresen exportator d’armas al Mond e que l’Arabia Saudita n’es un crompaire màger. Mai concretament es lo segond client pus important darrièr Índia e davant Qatar, çò rapòrta BFM TV. Dempuèi 2008, l’Arabia Saudita a comandat 11 miliards d’èuros d’armas a França.
 
 
Sánchez prioriza “l’interès d’Espanha”
 
Tanben lo president del govèrn espanhòl, Pedro Sanchez, a anonciat al Congrès dels Deputats que cancelarà pas la venda d’armas a l’Arabia Saudita “a causa dels interèsses d’Espanha e de l’emplec dins de sectors estrategics dont plusors son situats dins de zònas tocadas pel drama del caumatge”. Sánchez fa referéncia a l’entrepresa publica Navantia qu’es a fabricar cinc vaissèls de guèrra per l’Arabia Saudita, e qu’emplega 6000 personas.
 
Segon Eldiario.es, Sánchez reconeis sa “consternacion” davant l’afar Khashuqji e quitament la manca de dreches umans en aquel país mas afirma que contunharà de vendre d’armas pr’amor que se pòt pas transformar “los ideals en realitats”.
 
Segon Sánchez, la nòrma espanhòla de venda d’armas es comparabla als estandards europèus, e l’estat espanhòl agís sus aquel terren “en seguissent d’autres instruments aplicables” coma la posicion comuna de l’UE, qu’introdutz de critèris estrictes de seguir, lo document OSCDE sus las pichonas armas, e las directivas dels forums internacionals de non-proliferacion.
 
 
 
Alemanha a cancelat la venda d’armas
 
Dimenge passat, la cancelièra alemanda, Angela Merkel, anoncièt que son executiu aviá anullat la venda d’armas a l’Arabia Saudita tant que s’esclaririá pas las circonstàncias de la mòrt del jornalista. Parallèlament, los govèrns alemand, britanic e francés publiquèron un comunicat conjonch ont considèran “injustificable” l’assassinat de Khashuqji que condemnan “dins los tèrmes pus energics possibles”.
 
Lo ministre de l’economia alemanda, Peter Altmaire, a demandat als autres païses de suspendre tanben la venda d’armas a l’Arabia Saudita. De badas, ara per ara.