Ongria a modificat sa Constitucion per enebir las personas sens domicili fixe. Segon Deustche Welle, la television publica alemanda, dempuèi la fin del comunisme Budapèst es de manièra constanta la vila de l’èst d’Euròpa amb mai de personas sens domicili. Mas ara lo govèrn autoritari de Viktor Orbán a aprovat una reforma constitucionala qu’estipula qu’“es enebit d’aver sa residéncia abituala dins l’espaci public”.
 
Tre ara la polícia pòt arrestar qui que siá sens domicili fixe e prene sos bens. En cas de recidiva pòdon quitament èsser meses en preson. La situacion es estada denonciada per l’oposicion que considèra qu’es un gèst inuman e indigne. Se calcula qu’en Ongria i a 30 000 personas sens domicili fixe. La proïbicion intrèt en vigor lo 15 d’octòbre passat e, segon Euronews, la setmana passada se faguèt ja tres arrestacions.
 
Lo primièr detengut o foguèt a Gödöllő, una vila de la banlèga de Budapèst. S’agís d’un ancian engenhaire que perdèt l’emplec e l’ostal. Son avocat assegurèt que lo detengut èra “inofensiu” e conegut de la comunautat. De mai, expliquèt que vòliá pas anar dins un centre per personas sens domicili pr’amor qu’abitualament i a de bagarras. Lo jutge lo daissèt en libertat, e mai lo procuraire aguèsse demandat trenta jorns de preson.
 
Lo Comitat d’Helsinki ongrés a anonciat qu’a entreprés d’accions legalas contra aquela mesura. Aquela organizacion que se bat pels dreches umans a denonciat que la reforma constitucionala siá “ofensanta envèrs los dreches fondamentals”, mas tanben que se tracte d’una mesura “inutila e cara”. D’efièch, an calculat qu’encarcerar una persona sens domicili fixe còsta a l’argent public aperaquí 8000 florins per jorn (25 èuros). Per tant, un cas coma lo detengut de Gödöllő, pel qual lo procuraire demandava trenta jorns de preson, costariá als contribuables 341 èuros, fòrça mai que lo loguièr mesadièr d’un apartament.