I poirà aver una preséncia fisica de policièrs dins las escòlas de l’estat francés. Atal o anoncièt divendres passat als mèdias lo ministre francés de l’Interior, Christophe Castaner. Aquela preséncia se poirà decidir “a de moments de tension particulara dins la jornada” e “evidentament amb l’acòrdi del cap d’establiment”, çò precisèt lo ministre. La tòca es que “l’escòla siá un endrech santuarizat, protegit, que nòstres ensenhaires sián protegits e que nòstres escolans sián tanben protegits d’aquelas violéncias inacceptablas”. Entre d’autras mesuras que presentarà dimars que ven al conselh dels ministres, Castaner avancèt de “permanéncias de policièrs o de gendarmas dins los establiments” per crear de luòcs d’escambis “dins los quartièrs mai dificils”.
 
Castaner faguèt aquela anóncia après una reünion tenguda amb los ministres de l’educacion e de la justícia, respectivament Jean-Michel Blanquer e Nicole Belloubet. Eles s’amassèron divendres passat, a la demanda del president francés, Emmanuel Macron, per establir un plan de lucha contra las violéncias a l’escòla.
 
Macron aviá exigit de “mesuras” après la publicacion d’un vidèo, pendent la dimenjada precedenta, que mostrava un escolan a menaçar son ensenhaira amb un pistolet factici dins un licèu de la banlèga de París. Los rets socials s’èran puèi emplits dels planhs dels ensenhaires, qu’amb l’etiqueta #pasdevague testimoniavan de cases de violéncias dins lors establiments.
 
Per ara, l’administracion a pas previst de s’interrogar sus l’origina d’aquelas violéncias.