De cercaires de l’Institut de Recèrca Biomedicala de Barcelona (Païses Catalans) an descobèrt los mecanismes qu’emplega una tumor de colon per desvolopar una metastasi e s’estendre cap al fetge. L’estudi foguèt publicat dijòus passat dins la revista Cancer Cell, e s’es presentat dins lo congrès que la setmana passada se debanèt a Barcelona, amb 150 expèrts en la recèrca d’aquel tipe de càncer.

Eduard Batlle, un dels cercaires, expliquèt a TV3 que, per qu’un càncer faga de metastasis, cal que las cellulas maire de la tumor corrompan las cellulas sanas. Es lo primièr còp qu’un article scientific soslinha la “foncion fondamentala” de las cellulas sanas de l’entorn per l’expansion de la tumor.
 
I a entre 10% e 15% de malauts que passan pas per aquel procès perque l’entorn de la tumor ajuda pas las cellulas malautas a se multiplicar. Aquò vòl dire qu’aqueles pacients faràn pas cap de metastasis e a la malautiá s’arrestarà; aquela descobèrta, doncas, lor pòt evitar los tractaments mai agressius. Dins los cases contraris, cal agir a l’envèrs.
 
Cal, doncas, estudiar l’entorn de la tumor per saber, segon l’estudi, se i aurà de metastasis, çò que permetrà de bastir de tractaments mai personalizats.
 
Los autors de l’estudi se fisan qu’entre 3 e 5 ans, i aurà una espròva per detectar las possibilitats qu’un malaut del càncer desvolope una metastasi.
 
Lo trabalh dels cercaires catalans a mes las basas dels “espleches que se pòdon emplegar per predire lo risc bas o naut de metastasi” de la tumor de colon cap al fetge, principal organ on s’espandís normalament.
 
Al delà, una autra descobèrta: las metastasis an de besonh l’interaccion entre doas ormònas per se desvolopar. Segon los cercaires de l’estudi, en arrestant aquela comunicacion, se pòt evitar la progression de la tumor.
 
Lo càncer del colon es lo segond càncer mai mortal del Mond e lo tractament abitual per lo combatre es la cirurgia combinada amb la quimioterapia.