Faguèron de caumas generalas dins los Estats espanhòl e portugués, mentre que dins los autres estats d’Euròpa, i aviá de caumas parcialas, de conferéncias informativas e de protèstas.

Un fum de manifestacions e un seguiment desparièr de las protèstas se debanèron ièr, dins qualques estats d’Euròpa, contra las reduccions budgetàrias e las politicas d’austeritat. La Confederacion Europèa dels Sindicats (CÈS) las aviá convocadas.
 
Dins l’Estat espanhòl, la jornada de cauma se debanèt amb un seguiment de l’80% dels trabalhadors segon los sindicats, del temps que lo govèrn parlava sonque de 20%. Se podiá remarcar, totun, qu’aquela cauma generala foguèt mai seguida que la que se debanèt lo mes de març passat.
 
Pendent la jornada, i aguèt fòrça incidents, 110 arrestats e mai de 40 ferits, dont almens 18 foguèron de policièrs. Las manifestacions que clavèron la jornada foguèron fòrça nombrosas: se parlava de mai d’un milion de manifestants a Barcelona e tanben a Madrid, que visquèt una de las manifestacion mai grandas de l’istòria de la vila. Pasmens, la polícia ne comptèt qualques centenats de milièrs.
 
Catalonha se mobilizèt en plena campanha electorala. Totes los partits, exceptat lo Partit Popular, quitèron de far d’actes electorals. Ça que la, totes los partits d’esquèrra participèron a las manifestacions. Se pòt dire que lo debat per l’independéncia venguèt un debat sus las politicas socialas pendent la jornada d’ièr.
 
Dins l’Estat francés, aperaquí 200 protèstas foguèron convocadas. Cal soslinhar la manifestacion de qualques milièrs de personas a París dins la Plaça de Montparnasse, que marchèron cap a l’École Militaire, en una de las manifestacions mai nombrosas de la vila francesa. En Occitània, la manifestacion mai nombrosa se debanèt a Marselha, amb 2000 personas naut o bas, segon d’informacions del jornal La Provence.
 
Dins l’Estat italian, de desenats de milièrs de trabalhadors marchèron sus las carrièras en mai de cent manifestacions convocadas pel sindicat majoritari, la Confederacion Generala Italiana del Trabalh (CGIL). Los estudiants participèron tanben a las manifestacions debanadas a Roma, Milan e Turin. De fòrts afrontaments amb la polícia causèron divèrses ferits leugièrs entre los policièrs.
 
En Portugal, la cauma generala se vegèt d’un biais irregular dins los servicis estatals e las escòlas, mentre que se sentiguèt amb fòrça dins los transpòrts publics e las indústrias, segon los mèdias. E mai se las manifestacions se vesián fòrça multitudinàrias, lo govèrn facilitèt pas cap de donada sus l’incidéncia de la cauma, coma tanpauc o faguèt pas dins las doas autras caumas generalas que lo país visquèt ongan.
 
En Grècia, los principals sindicats del país, GSEE e ADEDY, e mai lo sindicat dels trabalhadors municipals (POE-OTA), convoquèron una cauma de tres oras contra aquelas politicas d’austeritat, en seguissent la cauma generala de 48 oras de la setmana passada, qu’aguèt una participacion de mai del 50% segon los convocants. A Atenas, aperaquí 5000 personas, segon la polícia, manifestèron contra las politicas d’austeritat e s’i poguèt veire de drapèls dels estats mai afectats per aquelas politicas antisocialas: Grècia, Espanha, Portugal, Itàlia e Irlanda.
 
En Belgica, qualques 1500 personas, segon la polícia, manifestèron a Brussèlas davant la sedença de la Comission Europèa. La protèsta, convocada per la CÈS e los sindicats bèlgas jos l’eslogan “Pel trabalh e la solidaritat en Euròpa, non a l’austeritat”, comencèt amb una marcha davant las representacions de l’UE de Chipre, Irlanda, Portugal, Espanha, Grècia e Alemanha, e s’acabèt amb una concentracion dins lo quartièr europèu. En Belgica, las protèstas se faguèron remarcar amb fòrça dins qualques sectors, mai que mai lo del camin de fèrre, ont la cauma parciala convocada pels sindicats foguèt seguida amb fòrça succès.
 
En Alemanha, qualques dos centenats de personas participèron a un acte de solidaridat convocat per la Confederacion Alemanha dels Sindicats (DGB) davant la Pòrta de Brandeborg a Berlin. De sòcis de la DGB, mas tanben de formacions politicas de l’oposicion socialdemocrata, verda e d’esquèrra participèron a la protèsta amb una enòrma pancarta que refusava las reduccions socialas en Euròpa.
 
Al Reialme Unit, de desenats de trabalhadors de la companhiá de trens Crossrail participèron a una manifestacion près de l’estacion del mètro londinenc de Tottenham Court Road per exprimir lor solidaritat amb los sindicats europèus. Qualques autras protèstas similaras se debanèron a Manchester, Sheffield, Newcastle e Liverpool.
 
En la Republica d’Irlanda, mièg centenat de personas s’acampèron davant la Banca Centrala Irlandesa, al centre de Dublin, per mostrar lor solidaritat en aquela jornada.
 
De lor costat, de representants de sindicats poloneses s’acampèron davant las pòrtas del Ministèri de Trabalh a Varsòvia per exigir mai d’emplecs e mens de reduccions budgetàrias. D’acamps similars se debanèron en las vilas de Gdańsk, Poznań, Wrocław e Katowice.