Una granda manifestacion se tendrà uèi a Perpinhan dins l’encastre del Jorn Nacional de Catalonha Nòrd. Organizada per las divèrsas associacions culturalas e partits politics, la marcha partirà a 16h de la Plaça de Catalonha. La celebracion ongan a luòc entre “la reflexion e la solidaritat amb lo sud”, çò especifica Directa. D”efièch, al delà de las revendicacions nòrd-catalanas, la manifestacion servirà per denonciar l’exili e las encarceracions dels dirigents catalans. De nombroses autobuses vendràn de Catalonha Sud per mercejar los nòrd-catalans d’aver ajudat a la tenguda del referendum d’independéncia del 1r d’octòbre de 2017.
 
Mièja ora abans lo començament de la marcha, a 15h30, lo collectiu Angelets de la Tèrra e lo Partit Comunista Francés s’acamparàn davant lo consolat espanhòl de Perpinhan en solidaritat amb los represalhats.
 
A la fin de la manifestacion es previst un parladís politic al pè del Castellet amb de participants de totes los Païses Catalans, e se legirà una letra escricha per Jordi Cuixart, president d’Òmnium Cultural, de la preson estant. Coma novetat, la comuna de Perpinhan a permés que se brandisca una granda bandièra independentista sul monument, magrat que, l’an passat, o permetèsse pas.
 
Lo Jorn de Catalonha Nòrd revendica d’escafar lo Tractat dels Pirenèus, e clava cada an la corsa per la lenga catalana apelada “Correllengua“, qu’a luòc long de totes los Païses Catalans, amb una seguida de concèrts a l’Ostal Musical.
 
 
Revendicacion dels Païses Catalans
 
Dins las darrièras escasenças, la revendicacion principala de la Diada èra marcada per la polemica reforma territoriala de l’estat francés, que diluissiá las encontradas catalanas dins la nòva region qu’a pres lo nom d’Occitània. Mas ongan, lo Collectiu 7 de novembre a recuperat un lèma pus nacional: “Sèm Catalonha Nòrd, fasèm Païses Catalans”. L’organizacion de l’eveniment a volgut revendicar tot lo país dins un contèxt que considèran que “cal refermar los ligams entre los territòris en totas las direccions”, çò explica Guillem Dalmau, membre del collectiu, a Directa.
 
 
Lo Tractat dels Pirenèus
 
Lo Jorn de Catalonha Nòrd se commemòra lo 7 de novembre, mas la manifestacion se fa pus tard dins una dimenjada car dins l’estat francés la data es pas feriada. Se remembra lo Tractat dels Pirenèus, signat per las monarquias francesa e espanhòla en 1659, que simboliza la particion de Catalonha, la pèrda de las institucions pròprias en Catalonha Nòrd, lo començament de la descatalanizacion sistematica del país e la resisténcia de l’identitat catalana als divèrses regims franceses.