Lo mond dels Pokémons arribarà dins los cinèmas durant la prima de 2019 de la man de Warner Bross. Lo filme tracta la desaparicion d’un detectiu conegut, Harry Goodman, que son filh, Tim, cercarà amassa amb Pikachu.
 
L’actor Ryan Reynolds fa la votz e los gèstes del personatge de ficcion de Pokémon, del temps que Justice Smith jòga lo ròtle de Tim Goodman.
 
Per ne saber mai, vejatz en seguida la benda-anóncia del filme, e manquetz pas la cronica de Zep Armentano dins sa tribuna d’opinion, a prepaus de l’anóncia d’aqueste filme.
 

 
 
 
Los noms de las creaturas Pokémon en occitan
 
Pokémon (prononciat pokemòn [pu.ke.’mɔn] malgrat l’accent grafic) es una marca creada per Satoshi Tajiri en 1995, mai que mai per de jòcs vidèo editats per Nintendo. En consequéncia aquelas creaturas apareguèron dins de mangas e de dessenhs animats, e quitament de filmes animats. A la fin de 2010, mai de 250 milions de jòcs s’èran venduts.
 
La primièra generacion de Pokémons recep de noms occitans per Danís Chapduelh en agost de 2016. “Me soi avisat que los noms d’aquelas bestiòtas èran clafits de jòcs, de mots-valisas, de referéncias a la cultura pòp coma a un folclòre mai o mens luenchenc. Me soi doncas amusat a lor cercar e a lor trobar de noms en occitan e a ne far un postèr, de bon estampar o transmetre”, çò precisava Chapduelh del temps que  prepausava un jòc inversat pels afogats: “Tornar trapar l’etimologia a partir dels noms!”
 
La lista dels dels noms occitans dels Pokémons de la primièra generacion la podètz trobar sus Wikipedia, e tanben sul blòg del Polit País dels Potonors.