La Cort Europèa dels Dreches Umans (CÈDU) exigís de Turquia la liberacion del deputat curd Selahattin Demirtaş, en preson preventiva dempuèi mai de dos ans. Dins sa decision, presa a l’unanimitat, los jutges de la cort d’Estrasborg declaran que l’encarceracion fa venir impossible al deputat de participar a l’activitat parlamentària, çò que viòla sos dreches politics e los de sos elegeires. Aquela senténcia pòt èsser un precedent per l’afar dels presonièrs politics catalans, qu’an tanben denonciat la violacion de lors dreches politics.
 
 
Ostatge politic
 
“Amb aquela decision de la Cort Europèa dels Dreches Umans, ma posicion d’ostatge politic es estada legalament enregistrada”, çò a dich Demirtaş per mejan de sos avocats, çò rapòrta Bianet.
 
D’autre caire, lo president turc, Recep Tayyip Erdoğan, a dich que las decisions de la CÈDU concernisson pas los tribunals turcs.
 
 
Mai de dos ans en preson preventiva
 
Demirtaş es lo copresident del Partit Democratic dels Pòbles (HDP), e fa mai de dos ans que demòra embarrat dins una preson turca en tot esperar d’èsser jutjat. L’acusan de collaboracion amb una banda armada e de propaganda en favor d’una organizacion terrorista.
 
La CÈDU a establit que Turquia aviá mancat als dreches de libertat e de seguretat, que l’estat turc a violat lo drech d’èsser presentat rapidament davant un jutge, lo drech d’una revision rapida de la legalitat de la detencion, lo drech d’eleccions liuras, e qu’a impausat la limitacion restrictiva dels dreches de Demirtaş. Aqueste tenguèt sa carga de deputat e se presentèt a las eleccions seguentas, mas a pas pogut participar a l’activitat parlamentària. E mai, la cort dels dreches umans considèra que la preson preventiva es una “ingeréncia injustificada” dins la libertat d’expression e d’opinion dels elegeires e del drech del politician curd d’èsser elegit e d’anar al parlament. Aquò significa la CÈDU establís, a l’unanimitat, que s’es alebat sos dreches politics e los de sos elegeires.
 
 
Acusat de terrorisme
 
Demirtaş  lo detenguèron en novembre del 2016, amb Figen Yüksekdağ, un autre cap de l’HDP, e es acusat de collaboracion amb una banda armada e de propaganda en favor d’una organizacion terrorista. La cort d’Estrasborg acceptèt que la detencion la faguèron en seguissent de “sospièchas rasonablas”, mas afirma que lo prolongament de son encarceracion preventiva a pas cap de justificacion. Lo ministèri public turc acusa los dos òmes d’èsser dirèctament restacats a las milícias del PKK.
 
 

El Tribunal Europeu de Drets Humans exigeix la llibertat del diputat kurd Selahattin Demirtaş @hdpdermirtas empresonat sense judici fa més d’un any i mig. Una situació que el CIEMEN fa temps que denuncia, i que des de fa un any també vivim a Catalunya #llibertatpresospolíticspic.twitter.com/gX2pYx9E1O

— CIEMEN (@elciemen) 20 de novembre de 2018