Dempuèi las protèstas e blocatges entamenadas la dimenjada passada, lo movement dich dels “Gilets Jaunes” talha d'estradas per protestar contra la pojada de las taxas suls carburants. La protèsta se ten dins tot l'estat francés, e de rebucada, dins la màger part d'Occitània. Lo tolosan Benjamin Cauchy es vengut en mens d'una setmana una nòva figura mediatica en se revendicant lo pòrtavotz del movement. Se tracta d'un òme de 38 ans qu'aviá passat pel sindicalisme estudiant e que puèi frequentèt l'ultradrecha, segon France 3.
 
De mençonar, abans tot, que plusors activistas del movement dels Gilets Jaunes refusa l'idèa d'aver un pòrtavotz en estimant que cada gilet jaune pòrta la votz del movement. Pasmens, Benjamin Cauchy es vengut l'interlocutor privilegiat dels mèdias en qualques jorns. France 3 rapòrta que l'òme “evòca son combat pel poder de crompa e contra lo «matracatge» fiscal, amb una veraia facilitat d'expression”. En mai d'aquò precisa qu'espontanèament Cauchy parla de son experiéncia politica e d'un mandat local jos l'etiqueta de l'UMP.
 
Mas la cadena es anada mai luènh e revèla que Cauchy foguèt un sindicalista fòrça actiu a l'Universitat de Lilla, dins lo nòrd de França. I estudiava lo drech e foguèt un cap de l'UNI, un sindicat pròche de la drecha. En mai d'aquò, segon France 3, Benjamin Cauchy auriá frequentat de membres d'un grop ultradrechista nomenat Union Corporativa per la Defensa e l'Entrajuda Lengadociana (UCODÈL), un grop que se revendica “nacionalista” [francés], e qu'a organizat d'eveniments neonazis.
 
Contactat per France 3 Occitanie, Benjamin Cauchy declara conéisser pas l'UCODÈL, e admet sonque aver “benlèu consultat lor sit”. Mas una font policièra destapa a la cadena que Cauchy “foguèt apercebut mai d’un còp amb de membres de l'UCODÈL”.
 
A l'ora d'ara, Cauchy ten una activitat professionala d'asseguraire pels Gilets Jaunes.