Un tribunal de Lhèida a condemnat a quatre ans e mièg de preson un oncle e son nebot que violèron una gojata a Vielha (Castièro) lo 17 d’agost passat. Los jutges an condemnat los assalhidors per un “delicte d’abús sexual” mas non pas per “viòl”, pr’amor que la victima lor diguèt de non mai d’una vegada mas lor resistiguèt pas fisicament. Lo ministèri public demandava una pena de 15 ans per cadun e que foguèsson acusats del crime de viòl, tecnicament nomenat “agression sexuala seguida”, mas los jutges an pensat que i aguèt pas pro de violéncia.
 
Dins lo jutjament, los acusats an reconegut qu’aguèron de relacions sexualas amb la victima mas en pretendent qu’aquestas èran consentidas. De son caire, la victima expliquèt, entre de sanglòts, qu’ela lor disiá tostemps que s’arrestèsson, que plorava e lor disiá de contunh de non, mas que lor aviá pas resistit pr’amor qu’aviá paur.
 
La senténcia explica los faches. Segon los jutges, las “practicas sexalas” se tenguèron en profechant del caractèr vulnerable de la victima e jos los efièches de l’alcòl e dels medicaments per l’ansietat, çò que “probablament poguèt afeblir sa capacitat de defensa”. E mai conta qu’un dels agressors, l’oncle, comencèt de potonejar la victima a la sortida de la discotèca Elurra de Vielha. El la penetrèt per la vagina e mai ela quitèsse pas de dire de non e de li demandar que cessèsse. Puèi, li diguèt a son nebot qu’èra son torn, e del temps que lo nebot la penetrava, la victima contunhava de plorar.
 
 
Defenduts per l’avocat de “La Manada”
 
Los assalhidors son estats defenduts per l’avocat Agustím Martínez, qu’entre d’autres afars, es lo que defend los condemnats de l’afar nomenat de “La Manada”, una senténcia masclista de la justícia espanhòla, similara a la que sèm a raportar, e qu’en abril passat descadenèt l’indignacion màger e de protèstas dins tot l’estat espanhòl.
 
Martínez a anonciat que depausarà un recors contra lo verdicte e que demandarà la libertat dels dos assalhidors, que son ara encarcerats preventivament. “Amb una pena de quatre ans poirián ja sortir per carrièras”, çò ditz l’avocat.
 
 
Mireia Boya: “Era justícia ei misogina”
 
L’èx-deputada aranesa Mireia Boya a manifestat son indignacion suls rets socials. “Quina ei era violéncia de besonh? Er assassinat? Era justícia ei misogina, e açò ei ua guèrra. E mos tòque de ben apròp. Damb era, contra eth masclisme”, çò a declarat.