Lo President del Parlament de Catalonha, Roger Torrent, rescontrèt dissabte lo president del Conselh Executiu de Corsega, Gilles Simeoni. Pendent lor reünion, Torrent e Simeoni escambièron sus la situacion politica de cada territòri. D’efièch, l’elegit catalan expliquèt al còrs qu’ara es Catalonha qu’a de presonièrs politics “per aver defendut la democracia”. De son caire, Simeoni mostrèt tota sa solidaritat amb lo pòble catalan.
 
Puèi, Torrent e Simeoni anèron a la ceremònia de remesa del Prèmi Coppieters, que decernís cada an lo Centre Maurits Coppieters (CMC) e qu’ongan lo laureat es Edmondu Simeoni, paire de Gilles Simeoni.
 
La fondacion politica europèa, reconeguda pel Parlament Europèu, a autrejat ongan lo prèmi a Edmondu Simeoni per son prètzfach envèrs la defensa de la diversitat culturala e lingüistica, lo dialòg intercultural, los dreches de las minoritats, la patz e la democracia e l'antiracisme en Euròpa.
 
Edmondu Simeoni es lo paire del movement nacional còrs modèrne. Fondèt en 1970 l’Accion Regionalista Còrsa, la primièra organizacion autonomista de l’illa.
 
 

We’re kicking off our 3rd #CoppietersAwards in Ajaccio!
This year we’re honouring Edmond Simeoni, a Corsican politician who has always believed in and worked for: democracy, autonomy, minority rights, diversity and anti-racism.
What a special day pic.twitter.com/o8aA051FAC

— Coppieters Foundation (@IdeasForEurope) 24 de novembre de 2018