Ei un arquitècte ahuecat de cinèma de la region, Bruno Granja, qui, un còp publicada l’anóncia de la barradura de la basa deus avions de carrei de tropas "Noratlas" e "Transall" s’ei perpausat entà servir d’intermediari deus estúdios Raleigh, los estúdios independents màgers deus Estats-Unis qui an signat produccions de la traca de "Piratas de las Caribas", "Spiderman" o "Avatar II" e qui cercavan un lòc on dobrir un ueitau siti de filmatge après seus sheis en America e un aute a Budapèst. Lo capdau, Michael Moore (un omonime deu realisator de "Bowling for Columbine" e deus dus musicaires de jazz!) present a Tolosa dejà un còp en genièr, a declarat s’estar enamorejat de la Vila Ròsa ("Lo monde son charmants, la region suberbèra!") e voler sosténguer lo cinèma francés. Los atots de l’anciana basa son numerós: bèras aprigadas dejà bastidas, larga surfàcia espleitabla, pistas d’aterida ja prèstas per las equipas, proximitat de sitis de filmatge naturaus (mar, mar grana, montanha, èrms rocalhós d’Aragon, castèths medievaus). En mei deus 5000 emplècs dirèctes pervists, l’aspècte a l’encòp economic e ecologic deu projècte (pas gran causa de hèr càder o bastir) a sedusit los elegits deu parçan. Ua reconversion de las escadudas en d’autes mots.

 

Adara, lo decís deu comitat interministeriau a balhat un vam navèth a l’espèr de véser lèu l’aglomeracion mondina se dotar d’un pòle industriau de miei en dehòra de l’aeronautica, dab l’acceleracion deus procediments administratius, la delimitacion d’ua surfàcia dedicada ad ua activitat culturau e un sosten de l’Estat. Après los famós "westerns spaghetti" de las annadas setanta, vaquí adara l’epòca deus "road movies caçolets".


Karol Kriglsztajn