Cinc cònsols màgers de Tolosan, de diferentas colors politicas, los an denonciats en justícia per aver permés als ciutadans de lors comunas de causir liurament se volián lo comptador Linky o non. Los cònsols màgers de Blanhac, Castanet Tolosan, Portèth de Garona, Ramonvila e Riumas an anonciat que se recampavan per se defendre ensems davant los jutges.
 
A fòrça d'èsser interpelats per lors administrats, inquiets per lor santat o lors libertats individualas, sus l'obligacion d'acceptar o non la pausa d'un nòu comptador Linky, los edils decidiguèron de prene d'arrestats municipals per impausar a l'operator Enedis de reculhir l'acòrdi prèvi de l'usatgièr abans tota installacion, çò rapòrta France 3. En seguida de lor decision, lo prefècte del departament de Nauta Garona los denoncièt al tribunal administratiu.
 
E mai aguèsson ja suspenduts pro d’articles d'aqueles arrestats municipals, los cinc cònsols s'amassèron a Riumas lo 19 de novembre passat, determinats a manténer lor posicion e convéncer la justícia administrativa. Per o far, an anonciat qu'anarián menar davant lo tribunal una accion conjoncha sul fons, pertocant la libertat d'acceptar o non la pausa dels comptadors Linky. O faràn per mejan d'un avocat comun.
 
Los comptadors Linky mesuran e transmeton dirèctament las donadas al provesidor d’electricitat, en permetent una facturacion mai precisa e en necessitant pas pus lo passatge d’un tecnician per legir lo comptador. En mai d’aquò, permet de far d’intervencions a distància. Mas son de mai en mai nombroses los ciutadans que refusan aqueles comptadors car, d’un latz, parlan d’ataca contra la vida privada e de l’autre s’inquietan de risques sanitaris.