Del 5 al 11 d’abrial de 2019, 28 escolans de 1a qu’estúdian l’occitan e l’alemand al Licèu Claudi Nougaro de Montelhs (Causse de Cailutz), acompanhats per lors professoras d’occitan e d’alemand, an montat un projècte de viatge pedagogic, per los menar en Àustria, a Viena e a Melk. Aquel viatge s’inscriu dins un projècte pluridisciplinari, ont l’accent es botat sus la nocion d’espacis e escambis.
 
Dins l’encastre d’un partenariat amb Isabella Parrer, professora al licèu de Melk en Austria, los germanistas van recebre en çò lors, los escolans austriacs, puèi seràn recepcionats a lor torn dins lor familha d’acuèlh a Melk. De mai, lo programa prevei una vesita comuna del TechnischesMuseum (Musèu de las Tecnicas), amb tot lo grop escolar. E sul camin del retorn, amassa vesitaràn lo camp de Mauthausen, qu’es lo compliment d’un apèl a projècte de Terre de Mémoires, que prepausa un trabalh a l’entorn del camp de Judes e Sètfonts (Causse de Cailutz).
 
Per quant als occitanofòns, seràn aculhits per Alexander Sigmund, un jove professor qu’ensenha lo francés, al Licèu Bundeshandelsakademie und Bundeshandelsschule Wien 10, a Viena. Trabalhèt sus la Nòva Cançon occitana e obtenguèt son mastèr, que sa memòria de recèrca portava sus l’estandardizacion de la lenga occitana. Ara, es a preparar sa tèsi qu’a per subjècte l’ensenhament de la lenga occitana en França, a l’Universitat de Viena. D’alhors, la facultat serà una estapa importanta del viatge, que los escolans e lors acompanhaires seràn recebuts pel professor d’occitan Peter Cichon.
 
Cal saber que l’occitan s’apren dins mai d’una universitat dins lo Mond, e que Viena fa partida de las vilas ont la lenga e la cultura occitanas an una plaça de tria. D’efièch, d’occitanistas plan coneguts coma Robert Linas, que fondèt en 1994 l’associacion Autriche et Pays d’Oc, e que se balha per mission d’aculhir d’estudiantas austriacas e de favorizar los escambis culturals entre los dos païses nòstres.
 
Enfin, Alexander farà la vesita de la vila en occitan. Puèi los liceans occitanofòns li poiràn far vistalhar Cauçada, perque a lo gost de la lenga e ven cada annada.En efièch, gràcias a TG’OC Tarn e Garona, dempuèi 6 ans, es recebut dins la region per Frederic Cayrou… e de segur vendrà en 2019!
 
Per fin qu’aquel projècte se realize, los liceans son plan investits e cèrcan tre uèi a demesir la part de pagar per las familhas. Alara qu’an començat de vendre d’objèctes dins lor entorn, se viran cap a sos simpatizants occitanistas, per participar al finançament, a travèrs d’una plataforma participativa de finançament securizada, ont explican totas lors motivacions: https://fr.ulule.com/viatge-a-viena/ Podètz tanben mandar un chèc al nom del Foyer Socio-Educatif du Lycée Claude Nougaro, a l’adreiça FSE du Lycée Claude Nougaro, Les Rouges, 82300 MONTEILS.
 
Venètz seguir totas las estapas e l’avançada d’aquel projècte sul blòg pedagogic, tengut pels escolans: https://lewebpedagogique.com/ldelorel/
 
 
 
Linda de Lorenzo



 
 
 

 
 
                                                    
                                                    
                                                    
                                  
                 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.   Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…