La cauma de la fam que comencèron dissabte passat los presonièrs politics catalans Jordi Sànchez e Jordi Turull es a recebre un sosten estrambordant. Mai de 170 000 personas an aderit a la denóncia que fan los caumaires contra lo Tribunal Constitucional espanhòl que, çò dison, blòca lors recorses per evitar qu’arriben a la justícia europèa. Lo sit vagadefam.cat compta en temps real lo mond qu’aderisson a la denóncia e lo temps de cauma.
 
Sus aquel sit, los dos caumaires an publicat una letra ont asseguran que vòlon donar un nòu vam a la dicha “revòlta dels sorrires“ e demandan que lor cauma de la fam destorbe l’esperit dels rescontres de celebracion de las fèstas de Nadal. Dins la letra, Turull e Sànchez demandan tanben lo sosten de “totes los democratas de Catalonha, d’Espanha, d’Euròpa e del Mond”.
 
 
Obligats de se seire a taula
 
L’avocat dels dos caumaires a denonciat que los caumaires son obligats de se seire a taula al refectòri de la preson; e mai Jordi Turull deu retirar los platèls e getar las rèstas del manjar a las escobilhas. L’avocat reconeis que lo protocòl de las presons es atal mas que lor deurián desliurar d’aquò. “Es pas la mteissa causa qu’èsser dins la cellula o a l’infirmariá sens accès a la possibilitat de veire lo manjar”.
 
 
Acamp a la preson
 
Mentretant, aperaquí doas mila personas s'acampèron ièr ser davant la preson de Lledoners per mostrar lor solidaritat amb los caumaires, en respondent a la crida de l’Assemblada Nacionala Catalana (ANC). Los manifestants entornegèron lo centre penitenciari e faguèron un cercle de lutz amb lors telefòns mobils.
 
S’agís de la primèra manifestacion d’una “tièra d’accions per establir una estrategia partejada amb totes los actors independentistas per fin de donar de vam a la via unilaterala e denonciar internacionalament la violacion dels dreches politics dels ciutadans catalans”, çò a dich l’ANC, que precisa que totas las accions seràn non violentas.
 
En mai de mostrar de solidaritat amb los presonièrs, l’assemblada acusa l’estat espanhòl de far d'un drech universal dels pòbles un delicte de rebelion: Cal pas confondre la lucha per l’autodeterminacion amb la lucha contra la repression”.
 

Cal preparar-se per la via unilateral, l’escenari més probable i l’únic que depèn de la societat catalana i permet ser proactius.
Si ho comparteixes, comptem amb tu. #SomANC!
Fes-te'n soci/sòcia. Fem-nos més forts!
https://t.co/s606K4bY1E#FemLaRepúblicaCatalanapic.twitter.com/FbePx59cXL

— Assemblea Nacional (@assemblea) 30 de novembre de 2018

 
 
 
De manifestacions en Catalonha e Aran
 
La solidaritat amb los caumaires se manifestèt tanben per carrièras en divèrsas vilas. En Aran, l’acamp se tenguèt sus la plaça de la glèisa de Vielha en responsa a la crida de Taula per Aran.
 

 
 
Reaccion del govèrn espanhòl
 
Après l’anóncia de la cauma de la fam, lo govèrn espanhòl reagiguèt sul pic per assegurar que los presonièrs politics catalans aurián un jutjament just, coma totes los ciutadans. Lo govèrn de Pedro Sánchez insistiguèt per dire qu’en Espanha i a la separacion dels poders e que la justícia “es la sola que pòsca prononciar de senténcias”.