Nathan Kaufmann, un geograf tolosan d’origina alsaciana, ven de far la primièra mapamond en alsacian, çò rapòrta 20 Minutes. Kaufmann es geograf, grafista e cartograf, e a realizat un trabalh de tria per adaptar los toponims de tot lo Mond en aquel dialècte de l’alemand.
 
Per aquò far, s’es servit dels conselhs de l’Ofici per la Lenga e las Culturas d’Alsàcia e de Modèla (ÒLCA) e de Pascale Erhart, directritz del departament de dialectologia alsaciana e moselana de l’Unistra (Universitat d’Estrasborg), qu’a fisat la traduccion a l’especialista Adrien Fernique.
 
“Per l’exonim dels noms, sèm partits dels noms sus las cartas francesas, alemandas e localas”, çò precisa lo geograf en explicant la faiçon de transcriure certans toponims. “Es un trabalhàs de recèrca”, çò apond. Enfin, Rio de Janeiro es estat traduch en Rio dé Schanéiro o Polinesia francesa en Frànzeesch Polynesie. “Es pas sistematic, cal pas traduire a tot prètz mas o far amb intelligéncia pr’amor que certans noms son impregnats dempuèi longtemps dins lo dialècte”, çò precisa.
 
Ara, Kaufmann espèra que la mapamond permetrà qu’òm s’impregne de la cultura alscaiana e sustot que “l’alsacian poirà descriure lo Mond sens far de manlèu a una autra lenga”.