La Comission Europèa (CE) crearà un “sistèma d’alèrta rapida” contra las falsas informacions per las eleccions europèas. L’executiu de l’Union Europèa anoncièt dimècres passat qu’establiriá aquel mecanisme en març de 2019 “per generar d’alèrtas” sus las falsas nòvas “en temps real” e facilitar l’escambi d’informacions entre los estats membres e las institucions europèas.
 
Segon la CE, lo sistèma serà basat sus “una comunicacion proactiva e objectiva de las valors e de las politicas de l’Union”. Lo plan per “se protegir” d’atacas informativas contra las eleccions de 2019 comprendrà tanben un budget del Servici d’Accion Exteriora de l’UE per combatre las falsas informacions. E mai cercarà de refortir l’unitat diplomatica europèa amb 5 milions d’èuros e d’engatjar 50 salariats especializats.
 
“Una democracia sana deu èsser basada sus un debat public dobèrt, liure e just. Nòstre dever es de protegir aquel espaci e de permetre pas que degun propage de desinformacions que noirisson l’òdi, la division e la mesfisança envèrs la democracia”, çò defendèt la Nauta Representanta de l’UE a l’exterior, Federica Mogherini.