Lo 13 de decembre, es lo jorn de Santa Lúcia. Al delà de festejar en onor de Santa Lúcia de Siracusa, lo calendièr crestian tradicional establís aquesta data coma l'origina del temps de Calendas, çò es lo temps de fèsta a l’entorn de Nadal e del solstici d’ivèrn. En Calendas, la cultura occitana s’i manifèsta plan, amb los repaisses en familha, de recèptas tradicionalas, los tretze dessèrts, lo cachafuòc o la soca de Nadal, las pastoralas, los nadalets, la decoracion de l’ostal e los tradicionals preseps tanben nomenats presepis, betlèms o grépias.
 
Per tant, Jornalet vòl organizar un còp de mai son concors de grépias, que son ganhant recebrà de polits presents. Pendent aqueste mes de decembre, e fins al 6 de genièr, mandatz-nos las fotografias de vòstre presep o presepi o betlèm o grépia. Publicarem vòstres imatges regularament e aital totes poirem veire cossí los autres legeires vivon las fèstas.
 
 
Per participar al concors de preseps de Jornalet
 
— Mandatz una fòto de vòstre presep abans lo 6 de genièr a info@jor... en indicant qu’es per lo concors de preseps.
 
— Lo 7 de genièr, la redaccion contactarà la persona ganhanta del concors e li mandarà lo present. Quand lo ganhant l’aurà recebut, nos mandarà una fòto amb lo present: serà publicada dins Jornalet amb la fòto de son presep.
 
— Mentre que lo mond mandaràn las fòtos, tre uèi e fins al 6 de genièr, la redaccion las publicarà dins una galariá especiala.
 
— Podètz veire las fòtos de las edicions precedentas [edicion de 2017] [edicion de 2016] [edicion de 2015] [edicion de 2012]
 
 
Los concorses de las annadas precedentas
 
Dins las annadas precedentas faguèrem de concorses similars, que nos permetèron de descobrir la riquesa de las tradicions ivernalas d’Occitània tota, e de conéisser cossí se passan Calendas en cò dels legeires de Jornalet. Lo concors de 2012 lo ganhèt Quentin Willaume pel presep qu’el meteis faguèt en representant un vilatge dels Alps de Provença, lo de 2015 lo ganhèt Beneset Thauvin del país de las Mauras, amb un presep tipicament provençal.
 
 
L'espectaclós presep de la familha Moll
 
Tant lo concors de preseps de 2016 coma lo de 2017 los ganhèt Josette Moll de Narbona Plaja per sas magnificas grépias que representavan un vilatge de la còsta de Lengadòc. Ongan en çò de Josette e Jean-François Moll an fach tornarmai un presep subrebèl, coma o podètz veire dins lo vidèo que seguís.