Divendres passat trobèron Chloé Rodriguez. Aquela gojata de 15 ans, desapareguda fa una setmana a Barjac (Garrigas), foguèt trobada dins lo còfre de la veitura de son presumit agressor, que ja l’an arrestat.

La joventa desapareguèt lo divendres precedent. Una amiga siá foguèt la darrièra que la vegèt, Chloé l’èra anada vesitar amb son escotèr, e aquel d’aquí apareguèt davant son ostal amb totas sas causas levat del casco e del telefòn mobil. Alavetz, la familha ne denoncièt lo raubatòri. Pendent tota la setmana, un centenat de gendarmas cerquèron a l’entorn de la vila, ajudats per de desenats de vesins.
 
Lo presumit agressor, qu’èra ja estat condemnat per agression sexuala, raubèt divendres passat un ordenador portable que i aviá dins una veitura a Offenburg (Alemanha). Lo proprietari de l’ordenador aguèt lo temps de notar la matricula de la veitura del raubaire e n’avisèt la polícia.
 
Foguèt aital que los cercaires arribèron fins a la veitura ont èra Chloé. Lo raubaire se faguèt perseguir e volguèt evitar d’èsser pres, fins que collisionèt amb una autra veitura que circulava per l’endrech dont lo menaire foguèt ferit. Dins lo còfre de la veitura, i aviá la gojata, qu’expliquèt a la polícia qu’èra estada raubada. “L’accident l’a pas ferida e sembla qu’es en bona santat”, çò diguèt lo pòrtavotz de la polícia d’Offenburg.
 
Lo raubaire, un òme de 32 ans, vesin del país de Chloé Rodriguez, aviá d’antecedents per agressions sexualas e aviá quitament passat tres meses en preson per de delictes faches en 2007, e fasiá sonque tres meses que n’èra sortit. Ja l’avián identificat suls fichièrs policièrs per raubatòri e falsificacion de documents. Dissabte, foguèt menat davant un jutge alemand e aquel l’a mes en preson, del temps que l’Estat francés va demandar un òrdre europèu d’arrèst.
 
Dissabte, los vesins de Barjac festejavan la fin aürosa de la cachavièlha de Chloé Rodriguez, mentre que los parents viatjavan en Alemanha per retrobar lor filha. Dissabte, a miègjorn, Chloé èra ja a l’ostal.
 
Chloé “desvela pauc a cha pauc tot çò que pòt”, çò disiá son paire, Jésus Rodriguez. “Nos a dich qu’aviá refusat d’aver un dialòg amb aquel òme, [puèi] obesissiá a totes sos òrdres”, çò apondiá lo paire, “per metre pas sa vida en perilh”. Atanben apondèt que “foguèt pas tustada” e qu’èra obligada d’anar dins lo còfre de la veitura quand intravan dins una zòna urbana.
 
Ara per ara, la gojata es emocionalament fatigada.