Edmondu Simeoni, paire del movement nacional còrs modèrne, moriguèt divendres passat a Aiacciu a 84 ans. Paire del nacionalisme còrs, fondèt en 1970 l’Accion Regionalista Còrsa, la primièra organizacion autonomista de l’illa.
 
Mètge de profession e figura emblematica del corsisme, Edmondu Simeoni es estat un referent del corsisme durant los darrièrs cinquanta ans e un defensor afogat de l’ecologisme e del feminisme. Mas sustot, Simeoni serà remembrat per son ròtle de primièr plan per estructurar politicament lo movement còrs e per lo menar sus la draia estrictament pacifica.
 
En agost de 1975, foguèt un dels protagonistas dels faches d’Aleria, la primièra granda accion del nacionalisme còrs modèrne. El e de desenats de militants ocupèron per las armas una cava viticòla per denonciar la frauda de l’elaboracion del vin e l’adjudicacion de las tèrras als pènegres. Lo ministre de l’Interior francés, Michel Poniatowski, reagiguèt amb una intervencion policièra e militara massissa, que menèt a la mòrt de dos gendarmas e a las nafras d’un militant autonomista còrs. Simeoni foguèt condemnat a cinc ans de preson e, mentre que se desvolopava l’accion clandestina de l’FLNC (Front de Liberacion Nacionala de Corsega), traguèt de l’experiéncia dolorosa d’Aleria un refús del militantisme violent.
 
En 1982, foguèt elegit a la primièra Assemblada de Corsega, e un an pus tard venguèt conselhièr de la comuna de Bastia.
 
Fa qualques jorns, lo 24 de novembre passat, recebèt lo Prèmi Coppieters, que lo decernís cada an lo Centre Maurits Coppieters (CMC), una fondacion politica europèa, reconeguda pel Parlament Europèu, qu’ongan a guierdonat Edmondu Simeoni “per son prètzfach envèrs la defensa de la diversitat culturala e lingüistica, lo dialòg intercultural, los dreches de las minoritats, la patz e la democracia e l’antiracisme en Euròpa”.
 
Edmondu Simeoni es paire del president del Conselh Executiu de Corsega, Gilles Simeoni.