Lo president de la Generalitat de Catalonha en exili, Carles Puigdemont, e qualques membres de son govèrn encarcerats, Oriol Junqueras, Raül Romeva, Josep Rull, Jordi Sánchez e Jordi Turull, presentan uèi a Genèva una denóncia contra l’estat espanhòl davant lo Comitat dels Dreches Umans de las Nacions Unidas, per la violacion de lors dreches politics coma deputats elegits del Parlament de Catalonha. En seguida se tendrà un acte per far venir publica la denóncia ont, en mai de Puigdemont, intervendràn l’avocat que presenta l’afar, Nico Krisch, la deputada de la CUP Maria Sirvent e la secretària generala d’ÈRC, Marta Rovira, que se tròba exiliada en Soïssa.
 
Aquesta denóncia planh la violacion dels dreches politics pel fach que lo jutge de la Cort Suprèma de l’estat espanhòl, Pablo Llarena, suspendèt als denonciaires lor condicion de deputats del Parlament de Catalonha. Una suspension que seriá illegala segon los avocats dels presonièrs politics concernits.
 
Lo Comitat de Dreches Umans de l’ÒNU es a examinar doas denóncias precedentas, de Puigdemont e de Jordi Sánchez, que poguèron pas èsser investits presidents de la Generalitat, e mai foguèsson de candidats prepausats pel Parlament, a causa dels empediments del jutge Llarena.