La Federacion 64 Calandreta que lança un aperet entà crubar sòus. Au moment quan aprèstan las festivitats taus 40 ans deu movement (la prumèra escòla que vadó a Pau en 1979), los de la federacion de Bearn que deven tanben har cap a ua situacion financèra complicada.
 
Dens lo lor comunicat, que puntan tot prumèr la baisha importanta deus emplecs ajudats, qui pertòcan mei que mei los contractes de las ATSEM. L’an passat, mercés a ua bèra mobilizacion, que s’i escadón a’us perlongar un drin, mes lo problèma que demora sancèr: que cau perennizar los emplecs. Totun, qu’ei de mei bon díser que har, e tad aquò, ne pòden pas guaire comptar sus l’estat. Aqueth, quan reconeisherà la mission de servici public d’ensenhament de las escòlas, que demora de mau voler entà dar los mejans adaptats. Que’s desengatja a petit drin deu servici public,e dab las dotacions de las collectivitats locaus qui baishan tanben, las escòlas que vaden mei anar fragilas, maugrat ua bèra frequentacion.
 
Se los capdaus e cèrcan a cambiar l’estatut de Calandreta tà l’assegurar ua basa solida, qu’an tanben besonh d’un sostien financèr popular, entà mantiéner ubèrtas las escòlas, mes tanben tà n’obrir d’autas, e har vàler la lenga nosta, pertot suu territòri. L’aperet qu’ei lançat per 60 dias; se voletz participar, rdv suu site Internet helloasso.com, o sus calandreta-bearn.org.
 
 
 
 
 
 
 

---

Aqueste article es possible gràcias a un acòrdi de cooperacion entre Jornalet e Ràdio País.