Camille Muffat, l’esportiva niçarda que foguèt campiona olimpica de natacion liura a Londres l’estiu passat, batèt divendres passat, a Angieus (França), lo recòrd del Mond en 800 mètres de natacion liura amb un temps de 8 minutas, 1 segonda, 06 centens, dins l’encastre dels Campionats de França.

Lo recòrd precedent, de 8 minutas, 4 segondas e 53 centens, foguèt establit per l’italiana Alessia Filippi en decembre de 2008, dins l’encastre dels campionats d’Euròpa a Rijeka (Croàcia).
 
“Mon melhor temps sus la distància èra de 8 minutas 23. Fabrice m’aviá mes l’enjòc d’o far en 8 minutas 04. Me podiái pas esbinhar”, çò declarèt a Eurosport l’esportiva niçarda, en se referissent a Fabrice Pellerin, son entraïnaire.
 
Son companh d’entraïnament, lo nimesenc Yannick Agnel, batèt tanben a Angieus un primièr recòrd del Mond del 400 mètres de natacion liura amb un temps de 3 minutas, 32 segondas, 25 centens. Agnel foguèt ja doble campion olimpic a Londres.
 
Muffat, atanben vicecampiona olimpica del 200 mètres en natacion liura e medalha de bronze a Londres amb lo relèu 4 x 200 mètres en natacion liura, disputarà la setmana que ven los Campionats d’Euròpa a Chartres (França), del 22 al 25 de novembre.