Qualques ans fa, al Cròs de Canha circulava una peticion contra l’urbanizacion amb lo lèma: “Mangi pas de betum, mangi de plancton”. Fàcia a l’urbanizacion intensiva de la riba de mar, Laurenç Revèst es anat al rescontre dels benevòls a Sant Laurenç de Var (Vencenc) que s’ocupan d’aquela resèrva marina pro rara sus la còsta provençala, en plen mitan de la Metropòli Niça Còsta d’Azur. Un endrech qu’es normalament protegit mas qu’en realitat, sens la vigilància dels benevòls, seriá degalhada pel mond que fan vejaire de saber pas legir “interdich de pescar” o que laissan los cans atacar los cignes. Revèst parla amb Daniel Narcy.

Situada a proximitat dei bocas de Var, es dins un airau contrastat entre zònas comercialas e espaci lagunari. Cau pensar que lo segond aeropòrt de França se tròba de l’autre costat. La riba de Sant Laurenç separada per lei quauquas isclas de Var. L’Aquarium naturau deis Ondadas blavas a festejat en lo 2018 li dètz ans de la sieu creacion en zòna marina protegida sonada “espaci pedagogic protegit”. La tòca èra de metre 3 ectaras d’espaci maritime situat sus la comuna de Sant Laurenç de Var per la preservacion dei espècias alieuticas (peis).
 
Profechant de la preséncia de nombroas espècias de peis mas tanben de passerons marins e d’una colònia de cignes, fuguèt decidit après aver obtengut l’acòrdi de la municipalitat e de l’Educacion Nacionala de ne far un luec ludopedagogic.
 
Despí un decenni, li enfants, que sigue dins l’encastre escolar, amb li centres aerats, en familha, amb un andicap, descuèrbon per de “matinadas descubèrta” aqueu paradís marin unic. Es guidat per la sigla MER: Mostrar, Educar, Responsabilizar. Li pichons mas egalament li adultes pòdon careçar li peis, li noirir, nadar en la sieu companhia a quauques desenaus de centimètres de prefondor. Sovent li passerons marins (gabians, gabianòlas, cignes) son de costat dau public que n’es ben content.
 
Lo site es animat cada matin per una chorma de (joves) retirats benevòls passionats qu’an de comun la proteccion dau mitan marin, de la natura. D’uni son d’ancians ensenhaires, sotaires, sauvaires en mar). L’ivèrn, intervenèm egalament en mitan escolar.
 
L’activitat Aquarium dei Ondadas bluas depende d’una associacion paramunicipala sonada AGASC Centre Nautic (Associacion de Gestion e d’Animacion Esportiva e Sòcioculturala).
 
Una subvencion annuala de 800 èuros nos es donaia a la quala cau ajustar de dons de particulars simpatizants, lo montatge de dorsiers recompensats per lo Prèmi Còp de Còr de 2013 per la BPCA, la fondacion TOTAL.
 
Despí la sieu creacion, l’Aquarium naturau a aculhit de miliers de personas, principalament d’enfants. Lo site es regularament mediatizat per la premsa, de reportatges TV regionaus e nacionaus.
 
Li espècias identificadas e repertoriadas son lo lobà, la saupa, la daurada, la morma, lo mújol, la blada, lo blacbas e lo popre.
 
Avèm denombrat la preséncia creissenta dau nombre de peis, ce que pròva la necessitat imperativa de crear un mai grand nombre d’espacis marins protegits.
 
Volèm verament incitar li comunas de promòure la visita de nòstre site, lo boca a aurelha passa pas totjorn per li comunas.
 
Per conclure, diriáu: mercés per vòstre engatjament en favor de nòstre environament.
 
 

 
Daniel Narcy e la sieu chorma benevòla
Rapòrta Laurenç Revèst