Mai de 300 personas mòrtas e d'un milièr nafradas es lo tragic bilanç del tsunami que l’a patit Indonesia aqueste dissabte devèrs 21h30 (15h30 en Occitània). Lo tsunami lo provoquèt l’erupcion del volcan Anak Krakatau que, segon qualques testimònis, pallevèt doas grandas èrsas.
 
Lo tsunami seriá estat provocat per un enòrme esquilhament de terren jos la mar après l’erupcion del volcan, e a tocat mai d’una zòna de l’estrech de la Sonda, que separa las illas de Java e Sumatra e qu’unís la mar de Java al nòrd a l’ocean Indian al sud.
 
Aquí i a fòrça airals toristics, e justament un dels mai afectats es la plaja de Tanjung Lesung, dins la vila de Pandeglang, ont almens 250 salariats de la societat estatala dels servicis publics PLN gaudissián d’un eveniment organizat per l’entrepresa, acompanhats de lors familhas.

Un vidèo enregistrèt lo moment que l'èrsa faguèt irrupcion durant un concèrt sus aquela plaja.

 

Detik-detik saat Tsunami menerjang
Tampak di video Band Seventeen sedang manggung.

Dikabarkan bassist dan manager Seventeen meninggal dunia.#PrayForAnyerpic.twitter.com/pCTmukhOsF

— Sukma Hapsari (@SukmaHapsari) 23 de desembre de 2018

 
Lo pòrtavotz de l'Agéncia Indonesiana per la Gestion de las Catastròfas a publicat sus Twitter un vidèo amb d'imatges aerians de l'airal.
 

Pantauan udara daerah terdampak tsunami di Pantai Kalianda Kabupaten Lampung Selatan. Korban dampak tsunami di Lampung Selatan per 23/12/2018 pukul 13.00 WIB: 35 orang meninggal duniq, 115 orang luka dan 110 unit rumah rusak. Pendataan masih dilakukan. pic.twitter.com/HcXVkEhqBx

— Sutopo Purwo Nugroho (@Sutopo_PN) 23 de desembre de 2018

 
 
Un autre trentenat de decèsses es confirmat en Lampung del Sud.
 
 
Una annada de malastres
 
La tragèdia acaba una annada de malastres en aquela region. En agost passat, i aguèt una tièra de tèrratrems que daissèron mai de 500 mòrts dins l’illa toristica de Lombok, mentre qu’en octòbre, un sisme seguit d’un tsunami causèt mai de 1200 mòrts dins l’illa de Celèbes.
 
Lo nom del volcan, Anak Krakatau, vòl dire "lo filh de Krakatoa" en memòria del volcan que lo precediguèt dins aquela illa. Lo volcan paire aguèt una erupcion fòrça violenta en 1883, e provoquèt ansin una tièra de tsunamis que tuèron mai de 36 000 personas. L’Anak Krakatau emergiguèt de la destruccion del Krakatoa en 1927 en creant una nòva illa.  Dempuèi alavetz es a créisser.
 
Lo volcan se tròba al mièg de l’estrech de la Sonda, un estrech que separa las illas de Java e de Sumatra en Indonesia en unissent la mar de Java e l’ocean Indian. Foguèt longtemps un estrech important per la navigacion internacionala en despièch dels perilhs importants  coma la prefondor cambiadissa, los bancs de sabla e l’activitat del volcan Krakatoa. Son usatge declinèt durant lo sègle XX al profièch de l’estrech de Malaca ont los aisses maritims son pus segurs.