Jornalet vos prepausa, cada jorn a partir del diluns 16 fins al dissabte 21 d'abril, una analisi dels programas electorals dels sièis candidats mai importants a las eleccions presidencialas francesas. Tostemps s'agiràn d'analisis jornalisticas d'un punt de vista nacional occitan e imparcial.
Nicolas Sarkozy, actual President de la Republica Francesa, repetís per segond còp la siá candidatura a las eleccions presidencialas francesas. Lo moment actual, pasmens, es fòrça diferent a l'an 2007, quand la crisi èra pas arribada encara, e aquò se pòt plan veire sul seu programa electoral, que conten de proposicions electoralas qu'en 2007 segurament seriá pas estat possible de las far.
Mens de dreits socials pels emplegats: la fin de las 35 oras
Lo programa electoral de Sarkozy conten una seguida de proposicions de cambiament de la legislacion francesa actuala. Lo mai remarcable, segurament, es la proposicion d'acabar amb las 35 oras que pendent d'annadas an caracterizat lo model francés de societat. Aital, lo programa de Sarkozy defend que "per crear de riquesas dins l'Estat Francés e assegurar lo finançament del nòstre modèl social, devèm trabalhar mai". D'un autre costat, tanben se prepausan d'autres cambiaments, coma rebaissar las cotizacions socialas ligadas a l'emplec per tal que "empelgar siá mens car", e far pujar la TVA per ne compensar las pèrdas.
Una candidatura nacionalista francesa e conservadora
Sarkozy se presenta amb un programa electoral plen de referéncias a la necessitat de reforçar la França, d'un punt de vista economic, mas tanben d'un punt de vista nacional e territorial. Aital, dins lo programa de Sarkozy, trobam de proposicions coma "Reforçar la resplendor de la França, a travèrs de la francofonia e dels franceses de l'estrangièr", "afirmar las valors republicanas". Es aquí que tanben i trobam de referéncias a l'inclusion sociala de l'immigracion, e als dreits e las obligacions d'aquestes collectius. Especificament, Sarkozy prepausa de cambiar la legislacion a rapòrt de l'obtencion de la nacionalitat francesa. Es aital que lo programa ditz: "una persona nascuda en França de parents estrangièrs que vòlga aquerir la nacionalitat francesa ne deurà far la demanda entre los 16 e los 18 ans." Es a dire, los enfants que naisseràn en França seràn pas pus d'un biais automatic de ciutadans franceses. Se lors parents son d'origina estrangièra, seràn considerats estrangièrs levat qu'exprimiscan çò contrari entre los 16 e los 18 ans.
Autonomia, descentralizacion, reforma territoriala
Evidentament, la candidatura de Sarkozy prepausa de contunhar la reforma territoriala aprovada aqueste mandat e que, pel moment, a pas lo sosten de totes los autres partits. Aquesta reforma implicarà la fusion dels departaments e las regions, e una pèrda de poder de las collectivitats regionalas e departamentalas en favor de las "grandas metropòlis", coma París, Lion, Marselha o Tolosa. Es a dire, lo modèl d'organizacion territoriala de Nicolàs Sarkozy avança pas cap a una concepcion federala de França, ont las regions o los "pòbles" de França pòscan aver una vertadièra autonomia amb de parlaments legislatius e govèrns amb de competéncias especificas, coma en Alemanha, Espanha o Itàlia. Al contrari. La reforma de Sarkozy prepausa de balhar encara mai de poder a París e mai de poder a las grandas metropòlis.
Lengas e culturas ditas regionalas: las grandas oblidadas
Lo programa de Nicolàs Sarkozy conten pas cap de referéncia a las lengas e culturas ditas regionalas. Zèro. La sola causa que i podèm trobar es l'engatjament per "Transmetre lo nòstre patrimòni cultural e promòure la creacion." I trobam, doncas, una abséncia totala a tota la problematica dels dreits lingüistics dels franceses de lengas regionalas, aital coma una abséncia totala en tot çò que concernís la promocion de la diversitat culturala intèrna de França. Per contra, lo programa de Sarkozy conten un fum de referéncias a l'engatjament per promòure e estendre encara mai la lenga francesa. Per exemple, de referéncias coma "La defensa del pluralisme lingüistic e la diversitat culturala dins lo mond passa primièr per un esfòrç exigent en favor de la lenga e de la cultura francesas, a l'escala internacionala". I avèm pas trobat, tanpauc, cap de mencion al sosten per desvolopar l'ensenhament public bilingüe (francés - lenga regionala) dins l'estat francés, ni tanpauc l'engatjament per ratificar la Carta Europèa de las Lengas Minorizadas o Regionalas.
Mens Euròpa, mai "estats-nacion"
La candidatura de Sarkozy prepausa de reforçar lo ròtle dels estats dins l'Union Europèa. Aital, en luòc d'avançar cap a una Euròpa de democracia dirècta e federala, ont lo Parlament europenc aguèsse mai de poder qu'actualament, Sarkozy prepausa, per exemple, la creacion d'una cambra parlamentària de la zòna Euro, qu'amassèsse de deputats del Parlament Europenc e de deputats dels parlaments dels estats de la zòna Euro, per tal que los Estats pòscan contrarotlar directament lo trabalh dels eurodeputats. Una autra de las proposicions es de "continuar a enriquir la construccion europèa amb de projèctes entre Estats pionèrs, en tot començant pel motor Franco-allemand".
Marçal Girbau per Jornalet
Marçal Girbau per Jornalet
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Lo programa de Nicolàs Sarkozy conten la referéncia "Transmetre lo nòstre patrimòni cultural" mas e quan se referís a la lenga ditz mai o mens clarament que se referís al sonque francés oficial.
Es ora de metre negre sus blanc que açò es una grana enganada. Nicolàs Sarkozy a una gran messorga dins lo sieu programa electoral pr'amor que pode pas trametre lo patrimòni cultural dels franceses, quitament lo patrimòni cultural de los territoris franceses tre al s. XIII, sens promoure las lengas tradicionals de los territoris als nòrd e al sud del flume Léger o Leire.
Lo programa de Nicolàs Sarkozy conten la referéncia "Transmetre lo nòstre patrimòni cultural" mas e quan se referís a la lenga ditz mai o mens clarament que se referís al sonque francés oficial.
Es ora de metre negre sus blanc que açò es una grana enganada. Nicolàs Sarkozy a una gran messorga dins lo sieu programa electoral pr'amor que pode pas trametre lo patrimòni cultural dels franceses, quitament lo patrimòni cultural de los territoris franceses tre al s. XIII, sens promoure las lengas tradicionals de los territoris als nòrd e al sud del flume Léger o Leire.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari