La tension permanenta entre Israèl e Palestina a desencadenat tornarmai de bombardaments de l’armada israeliana en Gaza, per mar e per aire, e lo lançament de qualques 500 fusadas sus Tel Aviv dempuèi lo territòri palestinian.
Aquela violéncia a ja provocat mai de 80 mòrts que la majoritat son palestinians e que la mitat son de civils, dont fòrça enfants. Los ferits son mai de 700. La comunautat internacionala se ditz preocupada.
Lo primièr ministre egipcian, Hisham Qandil, vesitèt Gaza per demostrar la siá solidaritat amb los palestinians e demandèt un cessament del fuòc immediat. Egipte s’es prepausada coma mediatritz amb lo sosten de la Liga Aràbia, que s’i es amassada d’urgéncia per analisar la situacion. Egipte ditz que la trèva es possibla.
Lo president dels Estats Units, Barack Obama, que ditz qu’Israel “a drech de se defendre”, parlèt per telefòn amb lo primièr ministre turc, Recep Tayyip Erdoğan, qu’es en Egipte. Erdoğan a analisat la situacion amb lo president egipcian Muhammad Mursi e, probablament, se reünirà amb lo dirigent d’Hamas en exili Khalid Mashal.
Los dirigents internacionals que se son adreiçats als govèrns israelian e palestinian son lo president francés, François Hollande, lo president rus, Vladimir Putin, e lo ministre espanhòl dels Afars Estrangièrs. Netanyahu los a mercejats del lor sosten del temps que ditz qu’“ensajarà de far pas mal als civils”.
Del sieu costat, lo secretari general de las Nacions Unidas a dich que vesitariá Jerusalèm e Ramallah aquesta setmana per parlar amb los dos govèrns.
Una de las condicions qu’impausa lo govèrn d’Israèl pel cessament del fuòc es que se lance pas mai de fusadas dempuèi lo territòri palestinian. Lo president israelian, Benyamin Netanyahu, a dich que fins ara an atacat mai de mila objectius e menaça que l’armada israeliana es prèsta per una “importanta extension de las operacions”. De fach, mai de 75_000 soldats en resèrva son estats apelats, e entre eles 20_000 son sus la termièra de Gaza dempuèi dissabte passat.
Dins aquel sens, lo ministre israelian dels Afars Exteriors a dich que se l’armada intra en Gaza, “deu anar fins a la fin”.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Paura tèrra que d'unes dison santa. Ieu, la diriái mailèu maldita. Per ela, una soleta solucion : LA LAÏCITAT POLITICA, un pauc dins l'ancian comtat de Tripòli…
Mas arribarèm lèu fait a un autre problèma : quina lenga per Palestina laïca ? Ebrèus ? Arab ? Aramean ? Las tres a l'encòp… Per ara, son qu'una lenga se far ausir plan clarament : lo plomb. E los enfants crèban per carrièra. Amen…
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari