Un mainat migrant d’uèch ans originari de Guatemala moriguèt dins la matinada de dimècres passat dins un espital dels Estats Units après aver traversat irregularament la frontièra. Lo mainat èra jos la gàrdia dels agents frontalièrs que lo menèron dins un espital de la vila d’Alamogordo (Nòu Mexic) quand mostrèt de simptòmas de malautiá.
 
Las causas del decès son oficialament inconegudas. Lo drollet comencèt de mostrar de signes de malautiá mentre que lo gardavan los agents frontalièrs. Foguèt alara menat a l’espital. Aquí, los mètges determinèron qu’èra enraumassat e lo remandèron als agents. Puèi, l’enfant comencèt de patir de nausèas e de vòmits, e los agents lo menèron tornarmai a l’espital ont moriguèt.
 
Lo Ministèri dels Afars Estrangièrs de Guatemala a sollicitat una enquèsta e l’accès als registres medicals del mainat. A mai, a afirmat que donarà assisténcia e proteccion consolara al paire e qu’assumirà la responsabilitat de repatriar lo còrs del pichon defuntat.
 
Es lo segond còp qu’un mainat morís jos la gàrdia dels Estats Units après aver trespassat la frontièra amb Mexic. Fa qualques setmanas, una filha de sèt ans, tanben originària de Guatemala, defuntèt après aver traversat illegalament la frontièra en passant pel desèrt del Nòu Mexic.