Lo govèrn de Japon a anonciat qu’en julhet de 2019 poirà tornar pescar de balenas sens cap de restriccion dins sas aigas. L’executiu romp aital son engatjament amb la Comission Balenièra Internacionala, creada en 1946 per garentir la preservacion d’aqueles cetacèus e n’evitar la pesca indiscriminada. En 1982 se pachèt una moratòria sus la pesca comerciala de balenas, mas las associacions animalistas avián denonciat que Japon contraveniá a aquel acòrdi.
 
Las naus balenièras an contunhat de capturar de balenas dins l’ocean Antartic e lo Pacific Nòrd, mas amb una tòca pretendudament scientifica. Lo país nipon s’èra batut per modificar l’acòrdi e obténer que la pesca de balenas foguèsse permesa e regulada. Coma i a pas reüssit, a abandonat l’organizacion. La decision a desvelhat lo chepic de qualques organizacions animalistas, qu’alèrtan de la possibilitat que lo nombre d’animals capturats aumente.