Actualitats
Confusion a las primàrias de l’UMP, que los dos candidats se son proclamats ganhants
L’UMP, lo partit francés de drecha, a fach de primàrias pel primièr còp dins la siá istòria; de primàrias que, per ara, an pas servit a grand causa. S’i presentavan dos candidats: Jean-François Copé, lo fins ara president de l’UMP, del sector mai drechista del partit, e François Fillon, primièr ministre pendent lo darrièr mandat del president Sarkozy e un pauc mai moderat. Mas, après una jornada maratoniana, a l’ora d’ara se sap pas qual a ganhat.
Los dos candidats se’n son proclamats venceires e s’acusan un a l’autre de fraudariá. Los problèmas de recompte de vòtes que i a agut dins sièis departaments an fach arrestar l’escrutini. Ara, la comission de contraròtle de las operacions de vòte deu decidir qual es lo nòu cap de la drecha francesa, e opausant de François Hollande. I aviá 650 centres de vòte repartits per tot l’Estat francés. Qualques 300_000 militants foguèron apelats a votar.
Fin finala, es Copé qu’es estat elegit. Ça que la, benlèu poirà pas èsser lo presidenciable a las eleccions de 2017. Aquò depend de Nicolas Sarkozy, que s’i poiriá tornar presentar. En fach, de tres parts doas dels sòcis de l’UMP preferisson que l’èx-president se presente per tornar a l’Elisi.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Confusion a las primàrias de l’UMP, que los dos candidats se son proclamats ganhants ? Çò que vòlon aqueles dos ? Lo poder ! Per far qué ? President après Hollande… E òc, cinc ans de galèra e d'impopularitat, passadas a agir contra l'interès de gaireben totes, per ajudar a s'enriquir un ponherat d'oligarcs financiaristas mai que discrèts, e après, coma lor idòla de fa pas gaire, Sarkozy, se poiràn passejar pertot dins lo mond, coma conselhièr en farlabicas e barjacadas a mai de 100 000 € la consultacion jornadièra… Per quant a Hollande, per capitar de véncer aqueles vendèires de bofigas, li va benlèu soscar al fait que s'es estat elegit president contra la dreita, es benlèu per menar una politica coratjosament d'esquèrra contra ela…
#1 Benlèu sèm pas interessats a aquela gentalha, mas aquela gentalha es interessada a nosautres, mai que mai a far desparéisser los que parlam pas francés, los omosexuals, las femnas que vòlon èsser liuras, lo pòble occitan...
Fa qualque temps que los medias nos assadolan amb aquela istòria que val pas un pet de lapin. Istòria de mariòtas, òc, que sabèm que lo pichòt mariotista es a l'espèra. Per nautres, que siague Franceson o Francés, cambia pas res.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari